Namintura, nakuryente sa Davao

DEAD on the spot ang usa ka lalaki human nakuryentihan samtang namintura og atop alas 10:30 sa buntag, Biyernes, Agosto 16, 2024, sa Purok 14, Yellowbell Street, Mintal, Tugbok District, Davao City.

Giila sa Davao City Police Office ang biktima nga si alyas Rick, 21-anyos ug residente sa Purok 16 Don Roman, Barangay Sto Niño, Tugbok District ning siyudad.

Nakurat, suma pa, ang tagbalay human nga nasandig na sa wire sa Davao Light and Power Company (DLPC) ang biktima ug dunay mga sunog sa likod nga bahin.

Nasayran nga namintura ang biktima sa atop diin aksidente kini nga nasandig sa live wire hinungdan nga maayo kining pagka-kuryente.

Gilayong miabot ang Central 911 ambulance ug ang kapulisan sa Tugbok Police Station aron sa pag-rescue.

Gisulayan pa og dala sa Adventist Hospital ang biktima apan nakabsan na kini sa kinabuhi. (JPC)