NAKATALA ang Southern Philippines Medical Center (SPMC) og mga 13,000 ka pagpanganak sa ospital sa 2024.
Gisulti ni Dr. Mary Lee Lim, miyembro sa department of obstetrics and gynecology sa SPMC, nga kinatibuk-ang 13,449 ka pagpanganak sa ospital, nga sa maong gidaghanon, 16.29 porsiyento niini dunay hypertension, 1.8 porsiyento dunay respiratory complications, ubos sa singko porsiyento dunay cardiac disorder, 3.5 porsiyento dunay diabetes, 1.2 porsiyento dunay thyroid disorder, ug 0.1 porsiyento dunay inpeksiyon sa mga sakit.
“Our census is increasing, SPMC, the administration is very supportive. They hire more nurses,” butyag niya, Lunes sa buntag, Mayo 26, 2025, sa SM City Davao.
Maud ni Lim nga ilang gilauman nga kini nga ihap motaas pa apan nagtinguha sila sa pagkuha og dugang mga nars ug uban pang healthcare personnel aron nga modumala sa taas nga ihap.
Gitaho sab ni Lim ang datus nga gihatag sa City Health Office (CHO), nga 10 ka babaye ang namatay tungod sa komplikasyon sa pagpanganak gikan Enero hangtud sa Abril 2025. Sa maong ihap, duha namatay tungod sa pagpanganak sa balay ug usa ka kaso namatay tungod sa pagdugo, ug laing usa ka kaso ang komplikasyon tungod sa "preeclampsia or uterine rupture".
Gipadayag ni Dr. Naomae Mondia, department of obstetrics and gynecology sa SPMC, nga ang Department of Health (DOH) wala magdasig sa pagpanganak sa balay ug hilot tungod kay naghatag kini og hulga sa mabdos nga babaye.
Matud niya nga ilang gidasig ug naglaum nga mga babaye modangop sa medikal nga pagtagad. Mga mabdos mahimong moduol ug mangayo og tabang sa barangay health workers ug midwives.
Gikanayon ni Lim nga usa sa mga paktor nga manganakay nga mga inahan mopili nga sa balay lang, tungod sa ilang kinaiya ug kultura. Ang ubang mga mabdos kompiyansa lang nga manganak sa balay.
Gitin-aw sab ni Dr. Giannelli Kristine Remocaldo, medical specialist sa PhilHealth-Davao, nga ang ilang buhatan naghanyag og nagkadaiyang packages alang sa mga mabdos nga inahan. Ila nang gidoble ang benepisyo alang sa manganakay nga mga babaye.
Tug-an niya nga ang ilang maternity care package naa na 12,675 alang sa mga pasilidad ug 15,000 alang sa paanakan sa centers, kini naglakip sa pre-natal care, check-ups, ug "birthing experience".
Gipahayag sab ni Kleah Guevarra, tigpamaba sa PhilHealth-Davao, nga ang ila sab nga gidugangan ang benepisyo sa cesarean procedures hangtud 50 porsiyento, gikan P19,000 ngadto sa P37,050. Iya sab nga gidasig ang mga manganakay nga inahan nga mopahimulos niining maong mga serbisyo. (Rojean Grace G. Patumbon)