GIDAKOP ug gibitbit ngadto sa buhatan sa kapulisan ang lalaki kinsa giingong nangatake’g traffic enforcer sa Purok Tambis, Ybanez Street, Barangay Sto. Nino, Panabo City sa Davao del Norte alas 9:35 sa buntag, Agosto 7, 2024.
Ang suspek giila nga si Ruel John Solis Barquin, 30-anyos, minyo, drayber ug molupyo sa Purok 5, Barangay Mesaoy, New Corella sa maong probinsiya.
Gibutyag nga ang suspek giindorso ngadto sa kapulisan sa Panabo City Police Station pinaagi sa traffic enforcer nga si Kimberly Aquino Padayao nga maoy mi-aresto kaniya, uban sa reklamante nga ginganlan og Marvin Ranes, 30-anyos, traffic enforcer/LTO deputized sa Panabo City, ug molupyo sa Purok Cervantes, Barangay Magugpo South, Tagum City.
Matud pa nga ang suspek giaresto ni Padayao sanglit naaktuhan kining armado og mahait nga hinagiban nga dunay gitas-on nga 14 pulgadas samtang giatake si Ranes sa siyudad sa Panabo.
Ang dinakpan, lakip ang nasakmit nga ebidensiya gikan kaniya, gikustodiya sa Panabo City Police Station alang sa tukmang disposayon. (DTV)