DAVAO DEL NORTE - Ang 14-anyos nga uyab nga giingong giinsulto maoy hinungdan sa pagpangluba sa 22-anyos nga ulitawo sa Purok Tandang Sora, Brgy. Magugpo Poblacion, siyudad sa Tagum.
Ang suspek nga giilang si Jasper Lapiz Polleros kinsa molupyo sa nahisgutang dapit nasuko sa biktima nga si Vicente Lemen, 21-anyos, ulitawo nga taga Prk. 5, Brgy. La Filipina, siyudad sa Tagum dihang giingong nanginsulto sa uyab niining si alyas Kyla.
Base sa inisyal nga imbestigasyon, nasayran nga si Lemen nakigtagay og inom sa balay sa iyang higala nga si Roberto Pepito Jr. kung diin ang suspek atua sab sa dapit ug giingong nasuko dihang nakit-an nga si Kyla giinsulto sa biktima.
Natigayon matud pa ang panaglalis sa suspek ug biktima hangtud nga niabot sa punto nga nikuha og mahait nga hinagiban ang suspek ug iyang giluba si Lemen kinsa naigo sa walang bahin kilid sa lawas.
Gidali pagdala si Lemen sa Davao Regional Medical Center sakay sa rescue vehicle aron siya matambalan samtang ang suspek gidakop sa mga miresponding pulis ug gipriso sa Tagum City Police Station.