DAVAO DEL SUR - Gibalhog sud sa prisohan ang usa ka lalaki human niini gidunggab ang kabayo tungod sa kapungot human siya gikulata sa iyang mga kaninom alas 11:20 Sabado sa gabii, Marso 2, 2024 sa Brgy. Dongan Pekong, Matanao.
Ang suspek giila nga si Arnel Pin Lingi, 27-anyos, ulitawo ug residente sa maong lugar.
Subay sa imbestigasyon lango sa ilimnong makahubog ang suspek, kinsa gikulata sa iyang mga kainom.
Apan diha sa iyang pag-uli kinsa nagping-it sa kasakit sa iyang kalawasan, iyang gidunggab ang kabayo nga iyang naagian gamit ang kutsilyong iyang dala-dala.
Atol sa pagkasikop sa suspek, nakuhaan kini og mga pinaugang dahon sa marijuana.
Duha ka mga kaso ang atubangon sa suspek, ang kalapasan sa Republic Act (RA) 8485 kon ang Animal Welfare Act ug ang RA 9165 kon Comprehensive Dangerous Drug Act of 2002. (Uban sa taho ni Cheche Diabordo, KAMM Media Network Davao)