Nasunogan sa Davao City giabagan na

GIBANA-BANA nga mokabat kapin kon kulang 250 ka mga panimalay ang giugdaw sa kalayo sa natigayong sunog pasado alas 8 kagahapon sa buntag, Biyernes, sa Purok 6-A, Gumamela Street, Barangay 5-A, Bankerohan, Davao City.

Nasayran nga nagsugod ang kalayo sa usa ka balay sa dapit nga gama sa light materials hinungdan nga daling mikanit ang kalayo sa mga kasikbit nga balay.

Sanglit dikit-dikit ang panimalay sa dapit, daling midako ang kalayo, ug nakapakusog niini mao ang hangin gikan sa Davao River.

Sa pagsulat ning balita, padayon nga nag-validate ang mga sakop sa City Social Services and Development Office (CSWDO) sa Davao City sa mga biktima sa sunog.

Sa kasamtangan, mga nasunogan anaa ni-estar sa Bankerohan Gym ug sa Lamayan ng Bayan sa Barangay 5-A.

Gipasalig ni Barangay 5-A Kapitan Gigi Mata nga mohimo dayon sila og mga pamaagi aron paspas nga matabangan ang mga biktima labi na sa mga nag-unang panginahanglan sama sa mga gamit sa pagtulog, hygiene kits, gamit sa pagluto ug mga sinina.

Ang City Social Welfare and Development Office (CSWDO), uban sa mga opisyales sa Barangay 5-A, mihimo dayon og community cooking, kauban sab ang Kusina ng Bayan aron dunay makaon ang mga biktima.

Wala pa gipagula sa Bureau of Fire Protection (BFP) Davao City Fire District ang hinungdan sa kalayo ug ang danyos sa sunog sanglit nagpadayon pa ang ilang gihimong imbestigasyon.

Miabot sa ikaduhang alarma ang maong sunog diin mga pasado alas 10 sa buntag na-kontrola ang kalayo ug gideklara nga fireout pagka-alas 12 sa udto.

Wa hinuo'y, gitaho nga nasamdan o naangol sa maong insidente, sumala sa Davao City Police Office (DCPO). (JPC)