GIBUTYAG sa Integrated Provincial Health Office sa probinsiya sa Cotabato nga nakadawat sila og impormasyon gikan sa Department of Health-Center for Health Development (DOH-CHD) Soccksargen Region nga nagkompirma nga dunay usa ka kaso sa monkeypox, Clade 2, niadtong Abril 25, 2025.
Ang pasyente usa ka 30-anyos nga lalaki gikan sa munisipyo sa Tulunan, Cotabato Province.
Hinuon ang pasyente anaa sa stable condition ug isolated. Dali siyang gikonsulta ug nakig-alayon sa mga hingtungdan sa pagsubay sa mga kauban niini sa lokal nga buhatan sa panglawas. Ang tanan nga kontak nga nahibal-an, gisubay ug gi-quarantine. Hinuon walay bisan usa sa mga kontak nagpakita og bisan unsang mga timailhan o sintomas sa sakit kon diin ang Provincial ug Municipal Health Offices maoy gitahasan sa pag-atiman sa pasyente.
Kasamtangang alerto ug gipursige ang tanang lakang alang sa publiko aron maseguro nga makontrol ang pagkatag sa maong sakit.
Gitambagan ang publiko sa DOH-12 nga magpabiling kalmado ug mabinantayon. (Edgar E. Fuerzas)