NAKATALA ang National Museum of the Philippines-Davao (NMP-Davao) og kinatibuk-ang 181,026 nga mga bisita gikan Enero hangtud Hunyo 2025.
Ilang gitaho nga sa 181,026 ka bisita, 98.57 porsiyento o 178,429 mao ang mga lokal nga bisita ug 1.43 porsiyento o 2,597 mga langyaw nga bisita.
Kasagaran sa mga bisita mga hamtong nga naglangkob sa 45.1 porsiyento o 81,728, gisundan sa 23.8 porsiyento o 43,140 mga tinun-an sa kolehiyo, 8.0 porsiyento o 14,476 mga senior high school nga tinun-an, 7.8 porsiyento o 14,107 mga elementary pupils, 6.6 porsiyento o 11,923 mga junior high school, 5.1 porsiyento o 9,313 mga kabataan o preschoolers, ug 3.5 porsiyento o 6,339 mga senior citizens.
“This broad range shows how the museum continues to be a learning space and cultural haven for everyone, from the youngest learners to our honored elders,” matud sa NMP-Davao sa ilang Facebook post, Lunes, Hulyo 7, 2025.
Matud sa NMP-Davao nga kining ihap maoy pruyba sa padayong interes sa publiko sa kultura ug kabilin sa rehiyon ug nasud. Ang museum giingon nga nagpasalamat sila alang sa suporta sa publiko sa ilang mga programa ug aktibidad.
Kahinumdoman nga ang museum gitaho nga sukad sila nagbukas niadtong Disyembre 1, 2024, ang ilang buhatan nakatala na og gibana-bana nga 36,478 sukad Enero 2025. Gipasalig sa museum nga padayon sila nga mahimong museum alang sa tanan bisan tinun-an, propesyonal, senior citizen, ug Persons with Disability (PWD).
Gidasig sa NMP-Davao ang publiko nga mobisita sa museum kay abli sila gikan 9 sa buntag hangtud sa 5 sa hapon. Libre ang pagsulod sa buhatan, kinahanglan lang sa publiko nga magpresentar sa ilang balido nga ID sa pagsulod.
Ang una hangtud sa ikaupat nga andana naa ang exhibits sa NMP-Davao, samtang ang ikalima nga andana gidesignar alang sa Museo Dabawenyo, nga wala pa mabalhin sa lugar. Nibarog ang NMP-Davao isip maoy ikaupat nga national museum sa Mindanao ug giila isip maoy pinakadako sa rehiyon. (Rojean Grace G. Patumbon)