NAPAIG ang lawas sa traysikel drayber sa nahitabong sunog alas 12:05 sa gabii, Mayo 26, 2025, sa Esperanza, probinsiya sa Sultan Kudarat.
Giila ang biktima nga si alyas Ver, 43-anyos, minyo ug nagpuyo sa Barangay New Tarlac, Esperanza.
Gibutyag ni Sultan Kudarat Police Provincial Office (SKPPO) Director, Police Colonel Bernard Lao nga samtang hinanok nga natulog si alyas Ver sulod sa iyang balay, kalit lang nidilaab ang dakong kalayo.
Wala na makagawas ang drayber sa iyang balay ug naapil sa paglamoy sa kalayo.
Sa dihang niabot ang Bureau of Fire Protection (BFP-Esperanza), ugdaw na ang balay nga gama lang sa kahoy.
Narekober sa mga sakop sa BFP-Esperanza ang napaig nga patay nga lawas sa biktima.
Sa pikas bahin, giingong duha ang namatay samtang laing upat ang naangol sa nahitabong engkuwentro tali sa duha ka armadong pamilya alas 10:00 sa buntag, Dominggo, Mayo 25, 2025, sa General Salipada K.Pindatun, Maguindanao del Sur Province.
Sa maong hitabo, daghang mga molupyo sa maong barangay ang namakwit sab aron nga di maipit sa kagubot.
Sumala kang Maguindanao del Sur Police Provincial Office (MDSPPO) Director, Police Colonel Ryan Bobby Paloma nga kalit nga niulbo ang pinusilay sa magkaaway nga armadong pamilya sa Barangay Midconding General Salipada K.Pindatun.
Tungod sa kahadlok sa mga molupyo sa maong dapit nga maipit sa kagubot, daling nanghikling kini paingon ngadto sa luwas nga lugar.
Giingong ang magkaaway nga pamilya mga sakop lang sa usa ka inilang Moro Front sa lungsod.
Nasayran nga dugay na nga magkadumot ang mga nahisgutang pamilya nila alyas Umbra ug alyas Dimpar gumikan sa rido ug nasugnuran pa gyud sa politika nga ilang gisuportahan sa milabay nga piniliay.
Gibantayan na sa militar ug pulis ang palibot sa lugar aron nga dili mapagan ang mga molupyo. (Edgar E. Fuerzas)