Natulog sa duyan girapido

Natulog sa duyan girapido
Google

PADAYON pang giimbestigahan sa kapulisan ang motibo nga nagpaluyo sa kamatayon sa mag-uuma nga girapido sa wala mailhing mga armado sa Purok 6, Barangay Basak, Nabunturan alas 3:50 sa hapon, Mayo 12, 2024.

Ang biktima giila nga si Ronald Sespene Alcampor, 51-anyos, minyo, mag-uuma ug molupyo sa nahisgutang dapit.

Subay sa report sa kapulisan sa Nabunturan Municipal Police Station, nasayran nga ang biktima nagpahulay sa duyan atubangan sa ilang balay. Apan niabot ang wala mailhing mga armado ug sa way daghang istorya, girapido ang biktima sa makadaghang higayon tumong sa nagkadaiyang parte sa lawas.

Human sa pagpamusil, mga suspek nanglakaw nga nipalayo paingon sa wala masayring direksiyon.

Samtang ang biktima gidali pagdala ngadto sa Davao De Oro Provincial Hospital-Montevista sa pamasin nga masalbar pa ang kinabuhi apan gideklarang dead on arrival sa doktor nga mihiling kaniya.

Narekober gikan sa crime scene ang lima ka mga basiyo ug usa ka buhing bala sa gituohang kalibre .45 nga pistola.

Gipahiluna ang patay’ng lawas sa biktima sa Lord Anthony Funeral Homes-Montevista sa probinsiya.

Gilusad na sa kapulisan sa Nabunturan MPS ang hot pursuit operation sa tinguha nga mailhan ug madakpan ang mikagiw nga mga suspek. (Dexter T. Visitacion)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph