GIPANUKARAN na sa Davao City ang paglunsad sa usa ka bulan nga selebrasyon alang sa National Disaster Resilience Month (NDRM) karong Hulyo, uban ang tema: “Kumikilos, Kayang Umaksyon ang Mamamayan: Isabuhay ang Kahandaan ng Bawat Isa Para Maging Ligtas sa Oras ng Sakuna.”
Sumala kang Lyndon Leovic Ancajas, acting head sa Law Enforcement, Communication, and Rescue Division (LECRD)-Central 911, ug acting overall training supervisor sa City Disaster Risk Reduction and Management Office (CDRRMO), nga ang siyudad nakahan-ay na og serye sa mga kalihukan nga nagtumong sa pagpalig-on sa kaandam kontra sa kalamidad ug ang kaamgohan niini.
Ang selebrasyon ablihan sa Martes, Hulyo 1, 2025, uban eskedyul sa Town Hall Session alang sa Hulyo 2 sa The Ritz Hotel.
Kini nga panagtigum magdani sa tanang mga barangay kapitan, treasurers, mga opisyal sa Barangay Disaster Risk Reduction and Management Committee (BDRRMC), ug mga tsirman sa Sangguniang Kabataan (SK).
Nag-unang hisgutan maglakip sa bag-ohay pa nga gipagawas nga kamandoan gikan sa Department of the Interior and Local Government (DILG), budget utilization guidance gikan sa Commission on Audit (COA), class suspension protocols gikan sa Department of Education (DepEd), ug mga katikaran sa panglawas bahin sa monkeypox ug Covid-19 variants gikan sa City Health Office (CHO).
Usa sa mga gipahimug-atan sa usa usa ka bulan nga aktibidad mao ang 5th Citywide ShakeOut Full-Scale Earthquake and Tsunami Simulation Exercise sa Hulyo 25 sa alas 9 sa buntag. Tanang mga barangay ug distrito sa tibuok Davao City mosalmot sa simultaneous drill, nga gitumong sa pagpalambo sa pagtubag sa komunidad sa mga panahon sa kalamidad.
“So far, we’re seeing increased awareness and better practice among communities,” pagpasabot ni Ancajas atol sa ISpeak Media Forum niadtong Hunyo 26 sa City Mayor’s Office. “We can see growing participation and the impact of our continuous information and education campaigns. But Davao is a large city -- we still have many communities to reach.”
Sa pagpangandam alang sa drill, mga mosunod nga kalihukan mahitabo: Hulyo 22 -- practice run gamit ang hazard maps; Hulyo 23 -- communication test; ug Hulyo 29 -- post-activity assessment and report.
Ang selebrasyon matapos sa Agosto 1 uban ang tree-planting activity nga maglambigit sa mga konsehal, mga opisyal sa barangay, volunteers, ug mga kaubang mga organisasyon.
Giawhag sab ni Ancajas ang publiko nga aktibong mosalmot sa ShakeOut drill pinaagi sa pagpraktis sa “duck, cover, and hold” routine sa gitakda nga oras.
Iyang gipahimangnoan ang mga molupo sa tsunami-prone areas nga makigkoordinar uban ang ilang mga opisyal sa barangay aron nga masayran ang mga evacuation routes ug safe zones.
“When the siren sounds, be ready to evacuate. Knowing your evacuation area in advance is key,” matud niya. (Rovie Ann Remolleno, Davao del Sur State College intern)