NAKIT-AN na ang lalaki nga gipangita human nga niambak sa Governor Generoso Bridge o mas ilado nga Bankerohan Bridge alas 7:05 sa gabii niadtong Miyerkules, Nobyembre 15, 2023.
Ang biktima positibong giila sa iyang ig-agaw human nga nakaplagan kining naglutaw alas 5:30 sa buntag, Biyernes, Nobyembre 17 kilid sa dagat sa Barangay 76-A Bucana.
Kumpirmadong ang nanag-iya sa sling bag nga itom nga unang narekober sa Bankerohan Bridge mao sa biktima nga si Chiyohide Ecoben, 26-anyos, taga Brgy. 19-B, Poblacion ning siyudad.
Hinuon, walay nabutyag ang ig-agaw sa biktima og nganong niambak kini sa tulay.
Kahinumdoman nga pakyas ang 911 Urban Search and Rescue nga marekober ang lawas sa biktima tungod sa kusog nga sulog sa Davao River sa maong higayon.
Gisulti sab ni San Pedro Police Station Commander Police Major Marvin Hugos ngadto sa SunStar sa paghinabi sa telepono nga insidente kadto sa pagpakamatay tungod sa tinguha sa biktima nga tapuson ang iyang kinabuhi pinaagi sa pag-ambak sa tulay.
“Suicide gyud to kay kung huna-hunaon nato, niambak man sya nga walay rason,” matud sa opisyal sa pulis.
Sumala pa nga gitaho sa usa ka mananagat ngadto sa pulis ang patay nga lawas nga nakit-an alas 6:00 sa buntag sa maong adlaw ug wala madugay gidala kini daplin sa Bilusa Street, Barangay 76-A Bucana.
Ang patay nga lawas sa biktima gidala ngadto sa purinarya alang sa tukmang disposasyon.
Samtang ang Philippine Mental Health Association-Davao Chapter (PMHA-Davao), Davao City nakatala na og 23 ka mga pagpakamatay gikan sa Enero hangtud Abril ning tuiga.
Gitumbok ni Teolifo S. Limikid, executive manager of PMHA-Davao Chapter, ang masukaron nga mental health nga mga isyu sama sa kabalisa ug depresyon maoy nag-unang hinungdan sa pagpakamatay.
Gitumbok sab niini ang presyur sa grupo, bullying, kapobrehon, ug kakuwang og suporta sa sosyedad nakatampo sa maong kahimtang.
Kon duna kamoy nasayran nga nakasinati og depresyon, palihug ayaw pagduha-duha og pangayo og tabang pinaagi sa mga numero: 1553 alang sa Luzon-wide (toll-free), 09663514518/09178998727 alang sa Globe o TM subscribers, ug 09086392672 alang sa Smart, Sun, o TNT subscribers.