COTABATO CITY -- Nasakmit sa mga pulis ang mga ismagol nga sigarilyo alas 3:00 sa hapon, Dominggo, Marso 16, 2025, sa Special Geographic Area-Bangsamoro Autonomous Region in Muslim Mindanao (SGA-BARMM).
Gibutyag ni Regional Highway Patrol Unit-Bangsamoro Autonomous Region (RHPU-BAR) Regional Director Police Lieutenant Colonel Christian Dela Cruz nga nakadawat sila og taho sa gi-abandona nga smuggled cigarettes sa Sitio Migkampong, Barangay Batulawan, Malidegao, SGA-BARMM.
Gisusi dayon kini sa mga sakop sa RHPU-BAR ug ilang nakompirma ang gi-abandona nga smuggled cigarettes.
Gibilin sa mga suspetsado ang container truck nga dunay sulod nga 80 ka kahon nga ismagol nga yosi.
Gikanayon sa mga molupyo sa maong dapit nga miikyas ang sakay sa container truck sa dihang ilang nasiplatan ang nagsingabot nga mga pulis.
Mga smuggled cigarettes gitakda nga ibaligya sa mga tindahan sa SGA-BARMM ug sa North Cotabato.
Padayon ang pagpalig-on sa mga pulis sa ilang kampanya batok sa smuggled cigarettes. (Edgar E. Fuerzas)