GIBATI na og pagmahay ang igsuon nga nipatay sa iyang kaugalingong igsuon human nga nahuwasan na gikan sa impluwensiya sa ilimnong makahubog.
Ang suspetsado giila nga si June Anthony Sato Pandian, 39-anyos, minyo, laborer, nagminghoy sud sa selda sa Calinan Police Station diin mahulagway sa iyang nawong ang pagmahay.
Gisulayan og kuha sa Superbalita Davao ang bahin sa suspek Martes, Hulyo 22, 2025, apan nagdumili kini nga mohatag og taas nga detalye. Inay miingon kini nga nahitabo na kuno ug wala nay mahimo pa.
“Nahitabo naman… wala na,” mubo nga pahayag sa suspek.
Sumala ni Davao City Police Office (DCPO) spokesperson Police Captain Hazel Tuazon nga napasaka na ang kaso batok sa suspek, Hulyo 21, ngadto sa korte.
“Na-file na ang case gahapon sa hapon (Hulyo 21, 2025), murder ug duha ka frustrated murder,” ingon ni Captain Tuazon.
Una niini, dead on the spot ang usa ka 34-anyos nga construction worker samtang samaran ang iyang live-in partner ug 11-bulan nga anak human gipanigbas gamit ang sundang sa suspek sa Pandian Compound, Purok 1-B, Baring, Barangay Wangan, Calinan District, Davao City alas 3:36 sa kaadlawon, Hulyo 20, 2025.
Ang biktima giila nga si Jay Sato Pandian, 34-anyos, construction worker, samtang ang ka live-in partner niini si alyas Sherly, ug ang ilang anak nga si alyas Flor, 11-bulan, kinsa dunay mga samad-tinigbasan.
Alegasyon nga ang suspek nasuko gumikan namatikdan niini nga ang iyang asawa giingong dunay gitago nga relasyon ngadto sa igsuon niini nga si Jay.
Anaa na sa luwas nga kahimtang sud sa Southern Philippines Medical Center ang mag-inahan samtang ang patay nga lawas sa biktima anaa karon sa Angel Funeral Homes sa Calinan, Davao City. (Jeepy P. Compio)