SUBLING gipahayag sa Northern Davao Electric Cooperative Inc. (Nordeco) Miyerkules, Hunyo 25, 2025, nga ang bisan unsang transisyon ngadto sa Davao Light and Power Company nagpabiling “premature,” kay ang Petition for Certiorari and Prohibition nga ilang gisang-at ngadto sa Korte Suprema padayong pang nakaung-ong alang sa resolusyon.
Nigawas ang pahayag human ang mga ehekutibo sa Davao Light nihimo og "courtesy visit" ngadto kang Davao del Norte Governor Edwin I. Jubahib niadtong Hunyo 23 aron nga tukion ang giplano nga pagpalapad sa kompaniya.
“Nordeco respectfully maintains that any such transition remains premature in light of the pending Petition for Certiorari and Prohibition before the Supreme Court, which questions the constitutionality and validity of Republic Act No. 12144. Until the High Court issues its ruling, we deem it prudent to await further legal guidance,” pagklaro sa Nordeco sa ilang pahayag Miyerkules, Hunyo 25, 2025.
Matud sa Nordeco nga pabilin sila nga mao gihapon ang nag-inusara nga electric distribution utility sa Davao de Oro ug Davao del Norte, gawas lang sa Panabo City ug sa mga munisipyo sa Carmen, Braulio E. Dujali, ug Sto. Tomas.
Giklaro sab niini nga tanang "operational matters and consumer concerns" sa ilang franchise areas padayon nga mahulog ilawom sa hurisdiksyon sa Nordeco, uban ang suporta sa ilang mga member-consumer owners (MCOs).
Gipahimug-atan sa kooperatiba nga ang bisan unsa nga transisyon kinahanglan nga mosunod og legal nga proseso ug kon kini nga mga "prerequisites", bisan unsang pagpuli ikonsidera nga “legally unsettled.”
Samtang positibo si Governor Jubahib bahin sa planong pagpalapad sa Davao Light, nga molangkob sa District 1 sa Island Garden City of Samal (Igacos) ug Maco sa Davao de Oro. "Dako ang atong kalipay nga sa katapusan, matag Dabawnon matagaan na gyud og lig-on, kasaligan, ug patas nga serbisyo sa kuryente. Humana na ang mga katuigan sa taas nga bayranan ug kanunay nga brownout,” padayag ni Jubahib sa Facebook post niadtong Hunyo 23, 2025.
Samtang sa pahayag sa Davao Consumer Movement niadtong Hunyo 23, 2025, nagpadayag sa ilang kabalaka sa pagkadelatar sa pagpuli sa Davao Light sa franchise area sa Nordeco. Ang group nagkanayon nga ang mga konsumante sa Davao de Norte ug Davao de Oro nisuporta sa paghulip sa Nordeco tungod sa ilang pag-antus gikan sa hataas nga power interruptions, di maayong serbisyo sa konsumante, ug taas nga balayranan sa kuryente.
“The delay of Davao Light’s takeover does not honor the wishes of consumers – a change in the power provider of Davao del Norte and Davao de Oro,” matud sa grupo.
Dugang pa nila nga sa pagkakaron ila nang makita ang pag-uswag sama sa mga poste nga ipabarog o paghisgut tali sa duha ka power distributors; apan kining tanan wala pa gyud makasugod tungod sa pagdumili sa Nordeco nga makig-alayon.
Nanawagan ang grupo ngadto sa Davao Light nga molihok na sa ilang transisyon ug tapuson ang pag-antus sa mga konsumante sa Davao del Norte ug Davao de Oro. Ila sab nga giawhag ang Nordeco nga makig-alayon uban ang transisyon ug niapela sa mga ahensiya sa gobyerno sama sa Department of Energy ug National Electrification Administration nga mohimo og mga lakang aron nga mapatuman ang balaod.
Gipahimug-atan sa Davao Consumer Movement nga ang pagpuli di tungod kanila, apan tungod sa konsumante “demanding for our rights to have reliable and affordable electricity.” Matud nila nga kung ang gobyerno o ang power distributors di mohimo og lakang, ang pag-antus sa mga konsumante magpadayon.
Sayo niini, ang Nordeco nipasang-at og petisyon uban ang "Prayer for Preliminary Injunction and Temporary Restraining Order", nihangyo sa Korte Suprema nga ideklara ang Republic Act 12144 nga "unconstitutional".
Gilalis sa kooperatiba nga ang RA 12144 “legally flawed” ug nagsupak sa "due process clause" sa 1987 Constitution. Giangkon niini nga ang petisyon gitumong sa pagpanalipod sa ilang "existing franchise" ug nagsuporta sa kinatibuk-ang electrification program sa gobyerno sa 2028.
Ang RA 12144, "which lapsed into law" niadtong Abril 6, 2025, "reassigns" sa electric franchise areas sa Tagum City, Igacos, ug
mga bahin sa Davao del Norte ug Davao de Oro ngadto sa Davao Light. Ang balaod nahimong epektibo ubos sa Article VI, Section 27(1) sa Konstitusyon, nga nagtugot sa balaud nga mahimong balaod kung ang Presidente di molihok niini sulod sa 30 ka adlaw. Si President Ferdinand “Bongbong” Marcos Jr. wala milhok sa balaudnon sulod sa gitugot nga panahon. (Rojean Grace G. Patumbon)