GIPASALIG sa Office of Civil Defense-Davao (OCD-Davao) ngadto sa publiko nga ang rehiyon nagpabilin nga hingpit nga andam sa panahon sa bisan unsa nga tropical cyclones nga nalantawan sa Philippine Atmospheric, Geophysical and Astronomical Services Administration (Pagasa) nga makaapekto sa Mindanao karong bulana.
Gikompirma ni OCD-Davao Director Ednar Dayanghirang nga ang ilang disaster response teams, uban ang local government units, Philippine Coast Guard, Philippine National Police (PNP), ug uban pang emergency clusters, nakaestambay ug andam nga motubag kung gikinahanglan.
Matud ni Dayanghirang nga base sa ilang padayong koordinasyon uban ang Pagasa, ang inisyal nga pagbana-bana nagpakita nga mga bagyo mahimong moigo sa Luzon o Visayas.
Apan iyang gipahimug-atan nga di sila mokompiyansa. Iyang gipasalig nga kung ang mga bagyo mosimang og direksiyon ug mopadulong sa Davao Region, tanang hingtundang mga ahensiya andam nga motubag.
Puno pa niini nga ang disaster response units sa tibuok rehiyon nipailawom na og intensibo nga pagbansay aron nga dugang pagpalambo sa ilang kaandam.
Gihisgutan sab ni Dayanghirang nga ang OCD-Davao nakadawat og bag-ong ekipo isip kabahin sa padayon nilang paningkamot sa pagpa-uswag sa disaster risk reduction and response nga kapabilidad.
Sayo niini, gipahibalo sa Pagasa nga duha hangtud tulo ka bagyo gilauman nga mosulod sa Philippine Area of Responsibility (PAR) karong Hulyo 2025.
Inisyal nga giingong gilauman nga makaapekto sa mga lugar sa amihanan sa Mindanao, mga awtoridad sa panahon nagpahimug-at nga ang padayong pagmonitor pabiling kinahanglan sa panahon sa kalit nga pag-usab sa latason nga dalan sa mga bagyo.
Gawas sa mga bagyo, nagpahimangno sab ang ahensiya sa publiko bahin sa epekto sa hanging habagat nga magpadayon nga magdala og katag-katag nga pag-ulan ug pagpanalugdog, kasagaran sa hapon ug gabii. (David Ezra Francisquete)