DILI makatabang sa pagbatok sa Coronavirus Disease 2019 (Covid-19) ang pag “hoarding” kon pagpanago og mga Isopropyl alcohol, mga hand sanitizer ug bisan mga pagkaon, kay karong panahona, daw nag-panic buying ang katawhan diha sa mga grocery stores.
Ang bugtong makatabang kanato aron malikay kita ning maong balatian, ang pagtuman sa mga guidelines nga gipagula sa atong gobyerno, sama sa kung mamahimo likayan ang pag-travel sa mga dapit hain dunay mga nataptan sa Covid-19.
Di naman sab karon ka-travel ang kadaghanan kay halos tanan dapit sa Pilipinas nag-banned na sa mga biyahe sa eroplano. Kagahapon lamang, gi-banned na ang flight gikan sa Clark padung sa Davao City ug ang Cebu City diin nauna na niini ang Manila.
Lakip sa gi-banned mao ang pag-travel 'by-land' diha sa bus, ug bisan unsa nga behikulo sa kalsada ug ang travel by-sea, apan ang biyahe sa Samal Island gikan Davao vice versa, puwede kaayo, pero ang mga langyaw di ka sud sa isla.
Lakip sa makatabang ang pagsunod sa pahimangno sa Department of Health (DoH) ang makanunayong paghugas sa kamot gamit ang sabon, Isopropyl alcohol ug mga hand sanitizer.
Ang pagkaon ug mga masustansya nga mga pagkaon ug ang makanunayong pag-amping sa pagprepara sa pagluto nga anaa ang kahinlo; ang pagpaluto niini og maayo aron malikayan ang mga mikrobyo nga maoy hinungdan sa virus.
Tambag ni Davao City Mayor Sara Duterte-Carpio nga di magpakabuang (obsess) sa pagtago og mga Isopropyl alcohol, mga hand sanitizer ug bisan daghang mga pagkaon kay di kini makatabang nga malikay kita sa Covid-19.
Nahimuot lang ang mayor sa iyang programa sa radyo sa dcDR FM-Disaster Radio kagahapon ug mitambang sa katawhan sa Davao Region nga di magpakabuang sa pag-hoard sa mga nahisgutan.
Bisan paman, mas maayong maneguro nalang, kini ang butyag sa kadaghanan nga anaa karon naglinya sa mga cashiers lane sa mga department stores, bahala na kuno og maibanan ang tinigum basta makapaneguro lang nga dunay mga naandam aron dunay mabira panahon nga kung molala na ang virus ug maabot sa Davao Region.
Sa laing bahin, kini ang trending karon nga post sa social media; kumusta kaha ang mga Indians (Torko) karon nga nagpatanto og salapi kon 5'6, mora'g kulob ang kolekta kay daw nahunong man ang ginagmay nga negusyo diha sa publiko.
Ang Roxas Night Market nga sagad inutang ang kapital sa Torko, karon temporaryo nga gipahunong ang pagpamaligya sa dapit, hinungdan nga balibad lang sa, unta di gyod masuko ang mga Torko, higala. Di lang Torko, naa sab mga silingan nato nga nagpautang og salapi, na hala, sabta sa tawon ang sitwasyon.
Makaguol ang sitwasyon ning kasamtangan mga higala, apan kinahanglan natong tanan nga magtinabangay nga kung dunay mga napanid-an nga Patients Under Investigation (PUI) ug mga Person Under Monitoring (PUM), kinahanglan ipa-report nato sa barangay aron ang barangay karon ang mopahibalo sa atong City Health Office.
Apan ang Davao City dunay hotline numbers diin asa ipadala ang mga impormasyon kung dunay namatikdan sa panglawas nga posibleng sintomas sa Covid-19.
Mag-ampo kita, ug mag-amping kanunay, tumanon gayod nato ang mga pahimangno sa awtoridad.