MAAYONG adlaw sa atong mga Super Suki.
Taas ang panahon nga wa ta mag-uban matag semana dinhi sa atong pahina tungod sa mga kakulian nga nanginahanglan nga pagagahinan og panahon.
Daghan ang mga nakalabay nga panghitabo sa atong palibot ug kasilinganan nga makahatag og leksiyon sa mga gustong mopadayon ngadto sa unahan.
Akong gisuhid karong semanaha ang mga dapit diri sa Leyte sa Kabisay-an aron makakuha'g detalye sa nahitabo nga trahedya nga mikutlo sa gatusan ka kinabuhi, mga inosenteng kabataan ug mga hamtong nga biktima sa landslide palibot sa dakbayan sa Baybay, Leyte.
Gatusan ang natabunan sa midahili nga bukid, gibanlas sa baha nga dala sa Bagyong Agaton, gianod ug nabangalan sa laing dapit samtang gatusan pa ang padayon nga gipangita ug nagpaabot ang ilang mga kabanay.
Sentro sa trahedya ang Barangay Kantagnos nga maoy napurohan sa landslide, mitabon sa gatusan ka mga residente, way kaikyasan kay na-sandwich sa nagun-ob nga bukid ug sa dakong bul-og sa suba niadtong Abril 10, 2022, adlaw sa Bendita sa Lukay sa pagsugod sa Semana Santa.
Duna unta silay panahon aron mobiya sa ilang dapit kay alas 6:00 sa buntag man ang unang paka nga nagsilbing pahimangno sa pagkabuak sa bukid.
Human milalin ang kadaghanan, namalik kay sa ilang kasing-kasing nagpabilin ang gugma sa nabilin nga mga kabtangan nga ilang nabiyaan sa ilang pagpanagan.
Mga alas 11 sa buntag nahitabo ang lanog nga buto nga gisundan sa dahunog sa yuta ug mitapos sa kinabuhi sa kadaghanan ug miangol sa pipila nga nabilin.
Buhi man apan wala nay ginikanan nga moatiman, wala nay bana, wala nay asawa ug pamilya nga ilang ikauban.
Magbasol man sila sa ilang gidangatan, ulahi na ang tanan ug ang hitabo nga ilang nasinatian unta mahimong leksiyon sa uban.
Sa Ebanghelio ni San Lukas 17:32, gisultihan ta kanunay nga atong hinumdoman ang asawa ni Lot, nga unta nakagawas ug luwas na sa trahedya sa gipahamtang nga silot sa Diyos sa dautang katawhan nga mulopyo sa siyudad sa Sodoma.
Ang asawa ni Lot, nahimong usa ka haligi nga asin dihang milingi siya sa pagtan aw sa kalayo nga milamoy sa kabtangan nga iyang gibiyaan ug mga katigayonan nga ilang gipundar sa dugay nga katuigan kay sakit sa iyang dughan nga sa usa ka pagpamilok, mahanaw ang tanan.