USA ka pulong nga may kalambigitan sa dili maayo nga buhat ang pagpangamang nga sagad mahitabo panahon sa gabii, inubanan sa kangitngit.
Ang makamangan posible nga mapanamastamasan ug kasagaran sa mabiktima, mga kababayehan nga kon ugaling magbunga ang linuog nga binuhatan, mag-antus ang ipakatawo nga bata nga wa gyud intawon kalabutan.
Uso ang pulong "kamang" ug tingali, walay usa ka politiko nga ignorante sa maong buhat aron lang makab-ot ang ilang gitinguha nga kadaugan.
Bulahan ang mga walay kalaban sa umaabot nga eleksiyon karong Mayo 9, 2022 sa posisyon nga ilang gidaganan, sagad niini, mga kandidato sa lokal nga level nga kagamhanan.
Usa sa kandidato nga walay kahasol sa umaabot ng eleksiyon si Congressman Isidro Ungab sa 3rd District sa dakbayan sa Davao.
Walay nangahas moatbang, mosaad aron pagkombinse sa katawhan samtang ang mga kalamboan nga nahitabo sa 3rd District sa Davao, mga nalatid nga project ni Cong. Sid Ungab.
Bisan ang mga buta nga wala nakakita, sa sugilanon nga gipakuyanap sa mga Marites nabaniog ang kalamboan.
Klaro na ang mga posisyon sa dakbayan sa Davao nga gidaganan sa mga sakop sa pamilya ni President Digong, sutoy pa sa kwitis ang ilang kadaugan.
Sa Davao Oriental, naghimo og lain nga kasaysayan si Gubernatorial candidate Corazon Nuñez Malanyaon, sama sa pangalan ni Alexander the Great, ang kasaysayan nagsulti nga sa iyang pag-ilog sa ubang kanasuran, walay gubat nga mahitabo kay motahan na man ang iyang mga kalaban sa wala pa siya makatunob sa nasud nga iyang padulngan.
Sa mga kalungsoran, makita ang init nga tupada kay dunay mga lig-on nga kaatbang labi na kon ang mga naa sa puwesto, dehado kay walay klaro nga nahimo alang sa katilingban.
Daghan ang mohimo og hilom nga diskarte, apil ang pangamang, kay panahon sa eleksiyon daghan naghandom nga sila usab makamangan.
Daghan ang nagapabilin sa kalisud nga epekto sa pandemic nga ang karon maoy importante samtang ang ugma hanap sa ilang panan- aw.
Sa higayon nga madungog ang pulong nga kinamangay, "Sana ol," mao ra gyud ang ilang pangindahay.