MAAYONG buntag mga SuperSuki.
Diesi nueve ka adlaw na lang, eleksiyon na. Andam na ba mo?
Iyahay na og diskarte ang mga politiko inubanan sa ilang mga suporters aron sulayan sa pag-agni ang katawhan ug patuohon nga sila ang dapat pilion sa umaabot nga piniliay sa Mayo 9, 2022.
Dunay pipila nga mitalikod na sa ilang mga kaalyado sa pagsugod sa kampanya, kay maneguro sa ilang kadaugan labi na kay panahon na o "hora de peligro".
Sa milabay nga semana, samtang padulong ko sa dakbayan sa Tacloban sa Leyte, atong gikatagbo ang panon sa mga sakyanan nga nag-caravan diin "RoSa" maoy ginasinggit sa katawhan.
Sa akong pagsabot, rosa, ang kolor nga nagapaila kang Leni Robredo ang ilang ginasinggit apan akong naaninaw nga Robredo pagka-Presidente ug Sara pagka-bise diay ang mga kandidato nga ilang ginakampanya nga botohan, RoSa ang gisumpay nga punoan sa ilang pangalan.
Dili man ta makabuot sa gusto sa katawhan apan misantop sa akong hunahuna nga dili kini gikan sa kampo ni Mayor Sara Duterte Carpio kay tin-aw man ang iyang pahayag nga kon dili UniTeam ang botohan, maayo pay wala kay sa pilion siya apan pagka-bise presidente, pero lahi ang presidente, ayaw na lang!
Sayud si Mayor Sara nga dili gyud mosilbi ug walay maayo nga sangputanan sa panggobyerno, dili gyud siya mahimong epektibo kon lahi ang iyang presidente nga ikauban.
Tanang lakang mahimo nga pagbabag sa iyang dalan aron wagtangon sa natad sa panggobyerno ang bansagon nga Duterte nga hinungdan sa pagkapapas sa mga yellowhan aron nga makapabilin paggunit bisan sa sidsid na lang sa sapot sa kagamhanan ug magpabilin ang ilang kolor hangtud sa sunod pa nga mga katuigan.
Sa akong pagsabot, ang among gikatagbo nga caravan, hut-ong kini sa mga despirado nga nagatan-aw nga daw nagpas-an og pababag nga kawayan si Kiko Pangilinan ug patungas ang iyang panaw subay sa kalbaryo sa kapildihan, pagka-bise presidente ni Robredo.
Mahiko sab nga bagahi ni Robredo si Pangilinan sa iyang nag- aginod nga panaw.
Sa kahimtang ni Robredo, pamasin kini nga makabitad pa siya sa pagkuha'g boto gikan sa supporter ni Mayor Sara. Posible pa ba kaha?
Dunay survey nga ilang gipagawas nga gipildi kuno ni Robredo si BBM apan giyam-iran man sa katawhan kay nalansang na ang huna-huna sa kadaghanan nga BBM-Sara ang ilang botohan bisan pa sa mga pagpangdaut uban sa maymay sa mga pangulo sa simbahan.
Ang pagpanghilabot sa mga kaparian ug pagpagamit sa mga pulpito sa simbahan sa pagpangampanya sa mga kandidato nga ilang gisuportahan, nakadaut na hinuon sa imahe sa ilang kandidato tungod nasilsil man sa utok sa katawhan ng managlahi unta ang dalan sa simbahan, lahi sab ang gobyerno.
Ang mga pangulo sa simbahan nga dapat motudlo sa pagpasaylo, nahimo na hinuon nga umolanan sa kayugot ug pagdumot kay gikan sa mga ngabil sa mga magpakuyanap unta sa maayong balita, inay nga mosangyaw sa ebanghelyo, panghimaraot na man hinuon ang gilibkas sa ilang mga baba.
Milagro na lang ang makausab sa desisyon sa katawhan kay wa pa misugod ang adlaw sa kampanya naumol na sa alimpatakan sa katawhan kinsa ang kandidato nga ilang botohan.
Angayan sab nato sabton nga ang tanan nga mga katikaran ibabaw ning kalibutan, Diyos ang motugot kay ang tanan ibabaw ning kalibutan nailawom man sa iyang pagbulut-an.