"DAGHAN ang wa masayod nga ang VCM nga gigamit karon nga eleksiyon mao ra kuno ang giayo ug gipanindot nga PCOS machine kaniadto."
Human na gyud ang eleksiyon! Daghan ang nagmaya, apan daghan sab ang nagpabilin nga dili pa makadawat sa hukom sa katawhan.
Daghan ang dili makatuo nga napildi sa ihap sa mga boto kay duna kunoy hukos pokus sa Vote Counting Machines (VCMs) nga gigamit sa Commission on Elections (Comelec).
Daghan ang nagmaya dihang unang mipagawas og partial result ang Comelec mga alas 6:30 sa gabii niadtong Lunes kay abtik kuno ang Comelec kon itandi sa milabay nga mga eleksiyon apan ang kahinam sa katawhan napulihan og kabalaka kay miabot og pito ka oras na kapin sa gabii, wa pa nasundan ang resulta.
Daghan ang nagsugod na og katahap nga duna nay manipulasyon sa resulta sa eleksiyon sama sa milabay nga mga panahon.
Tuig 2010, gisugdan sa Comelec ang computerization program gamit ang Precinct Count Optical Scan (PCOS) machine apan daghang kapalpakan nga nahitabo.
Tuig 2013, naaundang ang paggamit sa PCOS machines apan daghan gihapon sa makina ang mipalyar, hinungdan nga gigahinan og milyones nga kantidad sa Comelec ang pagpaayo sa mga makina.
Igo lang gi-upgrade ang PCOS machines ug giilisdan ang pangalan ug gitawag na nga VCM tungod kay dili na tuohan sa katawhan ug wa nay kredibilidad kay dili kasaligan.
Daghan ang wa masayod nga ang VCM nga gigamit karon nga eleksiyon mao ra kuno ang giayo ug gipanindot nga PCOS machine kaniadto.
Daghan ang wa pa ka-move on kay dili makadawat sa hukom sa katawhan o hukom sa VCMs sa eleksiyon niadtong Lunes.
Masabot nga naghandom og kabag-ohan ang kadaghanan ug giputol na ang political dynasty sa pipila ka mga dapit nga dekada nga gikuptan sa giila nga mga pamilya sa nasud.
Wala sab ni usa ka mga sakop sa Otso Diritso ang nakasulod sa 12 ka lingkuranan sa mga gipiling senador kay kasagaran mga alyado ni Presidente Rodrigo Duterte.
Masabot nga ang gusto sa katawhan nga mga senador mga tawo nga moabag sa pagpatuman sa mga proyekto alang sa kalamboan, dili ang mga magpunay og pamantay, manaway ug mobabag sa programa sa gobyerno.
Apan matuman ug makab-ot kaha ang kabag-ohan sa pag-ilis sa katawhan diha sa ilang mga lingkuranan nga migasto man og hilabihan ang kadaghanan sa mga mikandidato kay nagbaha ang bugas ug kuwarta sa wa pa ang adlaw sa botasyon?
Balik ta sa pangutana, unsaon nila pagbawi ang gipanghatag?
Ang mga oposisyon nagasulti nga mamahimo na nga rubber stamp sa pangulo ang senado kay walay napili nga oposisyon ug mahimo na kuno nga diktador ang Presidente apan ang suporta sa katawhan alang man kuno sa kalamboan.
Atong i-ampo nga padulong na ta sa kalamboan nga dugay ra unta kon tarong pa ang atong mga lider sa milabay nga kapanahonan.