HUMAN nawala sa kahanginan ang ABS-CBN tungod sa cease and desist order nga gipaguwa sa National Telecommunications Commission (NTC) niadtong Mayo 5 ning tuiga, nagbaha ang komento sa mga tawo nga nisimpatiya ug mga tawo nga nitabang pagsamad balatian sa mga apektadong empleyado.
Sa akong namatikdan, daghan ang nagsaway sa tagdumala sa kompanya labaw na sa mga empleyado nga nipadayag lamang sa ilang kahiubos tungod kay di makatarunganon ang gihimo sa gobyerno.
Gilat-an og maayo sila Coco Martin ug Kim Chui kinsa igo lang nipadayag sa ilang opinyon labot sa nahitabo. Ang nakadaut sa mga netizens (apil na dinhi mga professionals) kay imbes ilang sabton ang mga empleyado, ila na hinuong gibugal-bugalan nga nakapasamot sa gibating kasakit.
Sa pagkatinuod, sa panahon nga makita nako ang mga negatibong komento (ilabi na sa mga empleyado ug opisyales sa gobyerno) mobati ako og kaluoy sa among mga kaubanan sa buhat nga gawas nga nawad-an pa sila og trabaho, gihimo pa silang sumsoman sa kantiyaw sa mga palabi-labihon nga tawo.
Kinsa ang angay basulon?
Sa among programa sa radyo, daghan ang nagkanayon nga di angay basulon ang gobyerno tungod dunay pagkulang ang management nga mahatagan og bag-ong prangkisa sa Kongreso.
Tubag nako: wala nagkulang ang tagdumala sa kompanya tungod kay nakasumite na sila sa mga rekisitos sa Kongreso. Kamatuoran niini nga dunay gihimong committee hearing niadtong Marso 10, 2020.
Dunay miingon nga daghan ang kalapasan nga nahimo ang ABS-CBN mao nga angay lamang nga di hatagan og prankisa. Nan, kon duna may kalapasan ang kompanya, nganong wala may gihimo ang NTC sa milabay nga panahon?
Kadaghanan sab sa niingon nga angay basulon ang Kongreso. Tinuod nga hinay ang lihuk sa Kongreso tungod kay dunay pahayag ang atong pinangga nga Pangulong Rodrigo Duterte nga di gyud hatagan og prangkisa ang kompanya.
Milihok lang ang Kongreso dihang dunay presyur sa interest groups ug gidawat sa Pangulo ang pagpangayo og pasaylo sa ABS-CBN, apan nadelatar lamang sa pag-atiman sa polisiya kontra Covid-19.
Ang Kongreso nagkanayon nga angay basulon niini ang NTC tungod kay wala mituman sa ilang gipanumpaan nga mohatag og provisional authority sa ABS-CBN samtang gituki pa ang prangkisa. Nagpagawas og cease and desist order ang NTC tungod kay dunay suwat ang Solicitor General nga mamahimo silang mapasakaan og kaso kung mohatag kini og provisional authority sa kompanya.
Apan giingon ni kanhi Department of Information and Communications Technology (DICT) Secretary Rodolfo Salalima nga nakalapas ang NTC sa due process nga gilatid sa konstitusyon ug ilang balaod tungod kay napakyas sa paghatag og tsansa sa media giant nga mapahibalo ug madungog ang reklamo labot sa ilang padayon nga pagsibya.
Gitumbok sa kanhi kalihim nga wala mahatagi ang ABS-CBN og kopya sa petisyon, walay gipagawas nga show cause order ug walay gihimo nga hearing sa reklamo batok sa media network.
Bisan ang chairperson sa Civil Service Commission nakurat sa lakang sa NTC sanglit ang ubang opisina sa gobyerno naghatag og lugway sa paglukat sa ilang lisensya tungod sa Covid-19 pandemic.
Tungod sa nahitabo, nahinumdom ako sa gisulti sa among suod nga higala nga political appointee ni Pangulong Duterte pinaagi sa group chat nga nagkanayon: Wala sila (ABS-CBN) nakabantay sa Art of War ni President. Hahaha.
Sa Art of War, modaug ka sa giyera pinaagi sa paglipat sa kaaway.