SA SUNOD-SUNOD nga hitabo sa atong nasud sa miaging tuig ug ning pagsulod ning tuiga, namatikdan nako sa social media nga nagbinirahay na ang mga netizens.
Sa miang tuig, dunay usa ka netizen nga nagkanayon nga mirisi sa mga taga Mindanao tungod kay padayon nga nagsuporta ni Pangulong Rodrigo Duterte mao nga kanunay kitang gilinog.
Ang maong netizen nga taga Luzon, kung makasamad pa ang mga hait nga pulong sa taga Mindanao, aw, napinu-pino na ang lawas niini.
Kini nga netizen kritiko kaayo sa Pangulo mao nga napagan ang mga Mindanawon sa iyang komento tungod lagi kay lunod patay nga dumadapig ang mga taga Mindanao sa administrasyong Duterte.
Nan, karon nga duna na say nahitabo probinsya sa Batangas tungod sa pagbuga og bagang abo sa bulkang Taal, niingon sab ang akong mga higala sa Facebook nga panahon na sab tingali nga moingon sila og mirisi sa taga Luzon.
Sa nahitabo karon, di kita angay nga mobungat og mga dautang pulong tungod kay sakit kini alang sa mga biktima sa kalamidad.
Di lalim ang ilang kasinatian, busa gikinahanglan nato ang mga pag-ampo ug dugang tabang alang kanila, imbes nga ato silang biay-biayon.
Naigo pa sa kalagman, ato pang dugangan ang kasakit nga ilang natagamtaman? Di kini maayo, mga miga ug migo.
Ang kampo sa oposisyon modayon og yawit kung di makita ang Pangulo sa mga dapit nga gilinog ug uban pa. Tubag sab sa mga dumadapig sa administrasyon, nganong di man nila ibala sa bulkan ilang pinangga nga Bise Presidente Leni Robredo?
Sa nahitabo karon, di na angay ang paginawayay, kundi panahon sa pagtinabangay nga matabangan ang mga biktima ug labaw sa tanan, mapugngan ang grabeng pag-init sa kalibutan nga maoy usa sa mga hinungdan sa pagbuto sa bulkan.
Di lang pagbuto sa bulkan ang mahitabo nga katalagman sa pag-alimuot sa kalibutan, apil na dinhi ang La Niña ug El Niño phenomenon, ug daghan pa.
Maayo lang unta kung tinuod gyud nga gamhanan kining Pastor nga amigo sa atong Pangulo kay seguro gyud tang ma-“stop” niya ang linog, bagyo ug daghan pang hitabo.
Aron di kini mahitabo, angay gayud nga gahinan og dakong pundo ug magpakabana na ang gobyerno sa mga Climate Change Adaptation Programs.
Sanglit pakyas kita nga mahimong maayong piniyalan sa kalibutan mao nga gisilotan sa kinaiyahan.