SAMTANG gisulat nako kini nga opinyon kagahapon (Marso 30, 2025), nangandam usab ang akong mga kauban sa opisina sa ilang pag-apil sa global rally uban sa mga Dabawenyo atol sa ika-80 nga adlaw nga natawhan ni kanhi Presidente Rodrigo R. Duterte, kinsa karon gitiner sa detention facility sa International Criminal Court (ICC) sa The Hague, Netherlands.
Gidapit ko nila nga mouban ug magsuot og t-shirt nga may marka sa suporta alang sa kanhi pangulo. Apan, kay wala man ko nag-order og t-shirt, nakadungog ako nila nga nagkomedya pinaagi sa pag-ingon nga basin daw kontra-Duterte ako ug nagsuporta sa kasamtangang Presidente Ferdinand R. Marcos Jr.
Nakatawa lang kami sa maong komedya, apan may usa sa among mga kauban nga midugang nga "Bawal dinhi ang anti-Duterte!"
Aron makasabot ang tanan, akong gipatin-aw nga isip sakop sa media, nagpabilin akong non-partisan. Ang akong trabaho mao ang pagpahayag sa mga panghitabo ug isyu sa katilingban sa patas ug balanse nga paagi.
Sa panahon sa eleksiyon, naningkamot akong magpabilin nga patas sa akong mga balita ug komentaryo sa radyo. Sa tinuod lang, di nako batasan nga magsuot og t-shirt o bisan unsang parapernalya nga may kalambigitan sa politiko.
Akong gipatin-aw nga kung adunay isyu, akong gipaningkamotan nga ipadayag ang mga argumento sa duha ka kampo sa politiko.
Gipasabot ko usab nga adunay gitakdang professional ug ethical standards alang sa gawasnong pagpahayag, nga naggiya sa mga broadcasters sa paghimo og tukma nga sumbanan sa paghimo sa among trabaho. Lakip niini ang mga sumbanan sa komentaryo ug pag-analisa sa mga isyu, broadcast decorum, ug uban pa.
Kining tanan akong nakat-unan pinaagi sa mga seminar nga gipasiugdahan sa Philippine Press Institute (PPI) ug Kapisanan ng mga Brodkaster ng Pilipinas (KBP).
Samtang nagpadayon ang among panaghisgot, may usa nga mipahayag nga "bias" daw kaayo ang media, ilabi na sa pagbalita sa gidangatan sa kanhi presidente.
Gitubag ko sila nga mahimong bias lang ang media kung sa ilang mga balita wala ipadayag ang duha ka panan-aw sa nagbingkil sa duha ka mga dakong politiko. Bias usab ang media kung sa inadlaw-adlaw nga programa sa radyo, kanunay nga gidaut ang usa ka opisyal sa gobyerno nga wala hatagi og kahigayonan nga matubag ang mga isyu batok kaniya.
Sa kaso sa atong kanhi Pangulong Duterte, nga nagsaulog sa iyang adlaw nga natawhan kagahapon sa detention facility sa ICC, ako naningkamot nga ipresenta ang opinyon sa iyang mga dumadapig ug ipadayag usab ang sentimento sa mga biktima nga nagreklamo sa ICC.
Ug isip usa ka kolumnista sa mantalaan ug komentarista sa radyo, didto ako modapig sa mga dinaugdaog, sa mga hinikawan sa ilang tawhanong katungod, ug sa mga isyu nga naglambigit sa legalidad, moralidad, ug etikal estandard.
Hinuon, bisan wa ako miuban sa akong mga ka-opisina sa rally, akong gitimbaya ang atong pinangga nga kanhi pangulo pinaagi sa pag-ingon: Happy 80th birthday, Mr. President!