NIADTONG miaging adlaw, nakapaminaw ako sa programa sa radyo diin nalakbitan sa kaubanan nato sa buhat nga holiday ang adlaw nga Martes, Abril 9.
Makapila niya gibalik-balik nga Labor Day ang maong adlaw, dihang iyang gisusi ang kalendaryo, iya ra sab gisulti nga Day of Valor o Araw ng Kagitingan.
Kini ang nagpahinumdom nako nga angay natong hatagan og bili ang kalisdanan sa mga beteranong Filipino ug kinahanglan nga makasabot kita sa kamahinungdanon sa maong okasyon.
Kagahapon, ang tibuok nasud naghatag bili di lamang sa mga beterano sa giyera nga namatay sa ikaduhang gubat sa kalibutan apan sa mga beterano nga nakigbatok sa ngalan sa kagawasan.
Subay sa atong kasaysayan, ang Bataan mao ang katapusang probinsiya nga mitahan sa mga Hapon atol sa giyera. Ang Battle of Bataan nagpakita sa puwersa uban sa mga alyado sa Amerikano nga nakig-giyera sa mga Hapon.
Human niini misunod ang giilang Death March nga pinakataas ug lisud nga lakaw gikan Mariveles, Bataan ngadto Capas, Tarlac diin dul-an 10,000 ka mga gikapoy ug gigutom nga mga manggugubat nangamatay.
Ang maong panaw, naglakip sa pinugos nga pagbalhin sa 90,000 ngadto 100,000 ka mga Filipino ug Amerikano nga bihag sa mga Hapon gikan sa Bataan peninsula ngadto sa prisohan sa mga kampo diin gihimo ang pisikal nga pagdagmal, pagpatay sa mga bihag.
Ang kasaysayan nagsulti nga dunay mga gipamutlan og ulo, giabis ang ubol-ubol, gipusil, giduslak sa bayoneta, gilugos, gipangpusposan sa pul-an sa armas ug gidid-an nga makakaon ug makainom og tubig sud sa usa ka semana nga lakaw.
Isip paghatag og bili sa kabayanihan sa mga Filipino, gipabarog ang 60 ka tiil nga krus sa Mount Samt sa Pilar, Bataan nga mao karon ang giila nga shrine sa militar sa World War II.
Ning kasamtangang panahon, diyutay na lamang sa atong kabataan ang nasayud sa kalisdanan sa mga Filipino sa kamot sa mga Hapon.
Gawas pa nga wa masayud sa kasaysayan, kadaghanan sa kabataan karon wa nay pakabana sa atong palibot sanglit naimpluwensiyahan na sa bag-ong teknolohiya.
Nalinga na ang kabataan karon sa nagkadaiyang duwa sa social media ug kuwang sa kaalam unsaon nga makasugakod sa mga kalisdanan sa kinabuhi sa umaabot nga panahon.
Duyog ning pagsaulog sa Araw ng Kagitingan, ako nanghinaut nga ang kabataang Filipino magiyahan unta sa mga gawi sa mga beterano alang sa pagkab-ot sa malahutayong kalinaw ug kalamboan sa atong nasud.