GIKATAKDA unta kagahapong adlawa, Dominggo, Hulyo 27, 2025, ang usa ka kulbahinam ug daw kataw-anan nga charity boxing match tali ni Philippine National Police (PNP) Chief Gen. Nicolas Torre III ug acting Davao City Mayor Sebastian “Baste” Duterte.
Nganong kulbahinam? Kini tungod kay mga tag-as nga opisyal sa gobyerno ang magsangka sa ring, diin si Torre edaran samtang si Duterte batan-on pa. Ug nganong kataw-anan? Kini tungod kay ang paghinagitay, usa ka batasan sa mga gagmay nga bata nga kung magkainitay, dayon manghagit og sinumbagay.
Naorganisa ang maong event, nga giulohan og “Laban Para sa Nasalanta,” dihang midawat si Torre sa hagit ni Duterte nga magsinumbagay sila tungod kay isog lang ang PNP Chief tungod kay naa siya sa gahum. Human nag-viral ang hagit sa mayor, mitubag usab si Torre nga himuon nila kini nga "Boxing for a Cause" diin ang kita ilang ihatag sa mga biktima sa bagyo.
Apan, ang duwa nahimong “no contest” human si Duterte wala mitungha sanglit naa siya kagahapon sa Singapore, samtang si Torre misaka sa ring nga siya rang usa. Mao nga si Torre ang gideklarang daug sa maong away.
Nakadugang sa kontrobersiya ang pang-insulto ni Duterte nga kon andam gyud si Torre, magsinumbagay sila nga “walay kamera, walay gloves.” Gihagit pa niya si Torre nga kon interesado gyud siya, iyang hagiton ang iyang amo (Pangulong Ferdinand R. Marcos Jr.) nga ipailawom ang tanang elected officials sa drug test. Kini nga pahayag ni Duterte, sumala sa mga netizens, usa ka kasagaran nga diversionary tactic sa talawan nga tawo.
Human sa ilang paghinagitay, nag-viral dayon ang mga gihimo nga pag-ensayo ni Torre ug Duterte sa social media. Daghan ang nagsulti nga di magsilbi si Torre sa kinumo ni Duterte. Gani, ang igsuon sa acting mayor, Congressman Paolo Z. Duterte, nag-awhag ni Torre nga mopirma og waiver nga walay tulubagon ang iyang igsuon kung mapatay sa kinumo si Torre.
Duna say nagsulti nga di magsilbi si Duterte kang Torre kay wala kini resistensiya tungod kay walay disiplina sa lawas, samtang si Torre praktisado kaayo.
Apan, daghang pangutana ang nilutaw. Si Duterte, nga siya mismo ang unang nanghagit og sinumbagay kang Torre, milupad paingon sa Singapore niadtong Biyernes ug wala mitambong sa duwa. Sa iyang vlog, mitubag si Duterte nga aduna siyay “ubang buhaton” ug gipahimangnoan si Torre nga wala nakigkonsulta kaniya sa eskedyul. Iyang gisaway ang PNP Chief sa paggamit sa duwa isip distraction sa tinuod nga mga isyu.
Kagahapong adlawa, mitingog si Duterte kinsa nagsulti nga bakante na siya karong adlaw nga Martes. Apan ang pangutana: mouyon kaha si Torre sa maong eskedyul? Magkasinumbagay ba gyud kaha sila Duterte ug Torre? Kini ang atong atangan, mga suki.
Balik sa maong event, sumala ni Torre, nakatigom og sobra P300,000 gikan sa ticket sales ug kapin P16 milyon nga donasyon gikan sa mga kompaniya.
Giseguro sab sa PNP nga ang Department of Social Welfare and Development (DSWD) modawat sa maong pundo ug gamiton kini alang sa mga biktima sa kalamidad.
Ang event, bisan walay tinuod nga duwa, nahimong plataporma sa pagkahiusa sa katawhan, diin liboan ang nitan-aw ug niadto sa Rizal Memorial Colesium. Kini nagpamatuod nga kung ang gobyerno, pribadong sektor, ug katawhan magtinabangay, makatigum gyud og dakong kantidad alang sa mga biktima sa kalamidad.
Apan ang gihimo sa mga tag-as nga opisyal nato sa gobyerno nagpamatuod nga nawala na ang propesyonalismo nga gilatid sa 8 norms of conduct ilawom Republic Act 6713 kun Code of Conduct and Ethical Standards for Public Officials and Employees. Ug kini nga buhat di maayong panaminan ug sundon sa mga mosunod nga lider sa atong nasud.