NAGKAGULIYANG ang akong mga amigo nga DDS (Duterte Diehard Supporters) nga nakabase sa abroad dihang migawas ang PhilHealth Circular nga nagmando sa pagpausbaw sa contribution sa mga overseas Filipino workers (OFWs) ngadto sa tres porsyento gikan sa ilang binuwan nga sweldo.
Gipanghimaraut sa mga DDS ang mga opisyales sa PhilHealth tungod kay nagpatuman sa usbaw nga wala sila gikonsulta, ug labaw sa tanan - di sila makapahimulos niini.
Sanglit napungot ang mga DDS sa abroad, kinsa nagpasiugda sa online petition, daling nagmando si Pangulong Rodrigo Duterte nga di na himuong mandatory ang pagpamiyembro sa mga OFWs sa health care program sa nasud.
Tungod kay gimando kini sa Presidente, dali sab kaayo nga nakakambiyo ang akong mga amigo nga DDS sa ilang pahayag, ug gidayeg dayon nila ang Pangulo.
Angay na ba nga magmaya ang mga DDS ning panahona? Siyempre, dili. Kini tungod kay wala pa naamendahan ang Implementing Rules and Regulation (IRR) sa Republic Act 11223 kun Universal Health Care Act.
Ug labaw sa tanan, suspensyon lamang sa koleksyon sa taas nga premiums gikan sa OFWs ang termino nga giluwatan ni Presidential spokesman Harry Roque.
“Habang meron tayong krisis, ang naging desisyon ng Presidente (ay) huwag na muna tayong magpataw ng karagdagang pahirap sa ating mga OFWs, lalong lalo na sa panahon na napakarami sa kanilang nare-repatriate at nawalan ng trabaho,” suma ni Roque sa iyang regular press briefing.
Dugang niya nga membership sa OFWs sa PhilHealth “voluntary” sa pagka-karon.
Akong nasabtan ang mulo sa mga DDS nga nagyawyaw tungod kay di sila makapahimulos sa PhilHealth samtang naa sila sa gawas sa nasud. Pero, makabenepisyo baya ang ilang mga paryente niini nga naa dinhi sa nasud, di ba?
Apan, nasabtan sab nako ang PhilHealth tungod kay igo lang sila nagpatuman sa balaod.
Igo ra sila naningkamot nga mahimong malahutayon ang health program sa nasud pinaagi sa pagkolekta sa mga OFWs.
Ang balaod nagmando nga mandatory pagkamiyembro sa tanang Pilipino sa Health Care Program, lakip na mga OFWs.
Kung supak sila niini, ilang ipakita ang presyur sa mga policy makers sama sa mga kongresista, senador, ug Presidente ug iyang gabinete.