BISAN asang kanto sa atong nasud, walay laing gihisgutan kundi ang 2019 novel coronavirus nga gikan sa Wuhan, China.
Gani sa usa ka meeting kagahapon uban sa mga interns ug ilang mga ginikanan, ilang gipalutaw ang pangutana labot sa seguridad sa ilang mga anak nga i-deploy sa mga opisina sa gobyerno ilawom sa usa ka internship program.
Natural nga mabalaka ang mga ginikanan sa ilang mga anak tungod kay ila kining giamuma sukad pa sa gamay silang bata hangtud karon nga mogradwar na sa kolehiyo.
Tungod niini, kinahanglan usab nga mag-amping ang mga hintungdan nga indibiduwal sanglit manubag gayud sila kung simbako dunay mahitabo sa ilang mga interns.
Mas maayo man gud ang mangandam daan kaysa unya na kita manguros kung naigo na sa kilat.
Ang wa pagtagad maoy hinungdan nga nahitabo ang pagkuyanap sa makamatay nga coronavirus sa ubang kanasuran sa kalibutan.
Subay sa akong pagpanuki-duki, ang unang coronavirus infection sa Wuhan nagpakita og sintomas sugod niadtong Disyembre 1, 2019 ug katapusan sa Disyembre naalarma na ang medical circles sa Wuhan.
Mao na unta kadto ang panahon nga milihuk ang awtoridad sa China, apan milihuk sila di kontra coronavirus, hinuon milihok sila kontra sa mga tawo nga magpakabana labot sa maong balatian.
Giingon nga walo ka mga doktor ang gidisiplina sa gobyerno sa China ug gipugos sa pagpaangkon nga sayop ang ilang gihimo nga pagpakatag sa impormasyon labot coronavirus.
Imbes nga silotan ang mga doktor nga nagpakabana labot sa makamatay nga balatian, angay unta nga magpasalamat ang gobyerno ni China's President Xi Jinping.
Ingon niini ka-way-nada sa ilang gobyerno sa China, pugngan ang katawhan sa pagpadayag sa ilang mga mulo.
Subay sa mikatag nga balita, giangkon sa mayor sa Wuhan nga milyon na ka mga tawo ang nakasulod ug gawas sa ilang siyudad nga posibleng nagdala na sa virus.
Ang pagkadiktador sa China, alang sa uban maayo kaayo, apan sa nahitabo karon, di kini makaayo sanglit namiligro ang kinabuhi sa katawhan sa tibuok kalibutan.
Busa, miapela kita sa gobyerno sa Pilipinas nga molihuk gilayon aron di kita mahulog sa alaot pag-abot sa panahon.