PAHASUBO karon ang gipaabot sa tibuok ginsakpan sa Davao City Police Office labot sa accidental firing nga nahitabo sud sa San Pedro Police Station, alas 6 sa gabii niadtong Martes.
Patay ang duty desk officer nga si Police Staff Sergeant (PSSg) Renante Dapa Mercado, 38-anyos, minyo, ug residente sa Purok 7, Trading Boulevard, Brgy. 37-D Davao City.
Migula sa imbestigasyon sa DCPO nga accidental firing ang nahitabo diin natunong sa ulo ang bala sa service firearm ni Mercado. Nahagba kini diin dead on arrival sa ospital.
“On behalf of the men and women of Davao City Police, allow me to extend our deepest condolences to the family of Police Staff Sergeant Renante Dapa Mercado who was found lifeless and with gunshot wound due to accidental firing,” pamahayag sa acting director, Colonel Kirby John Kraft.
Giingon nga ‘oras na gyod sa kinabuhi ni PSSg Mercado’ kay sa ulo pa gyod natunog ang pagbuto sa pusil. Migula sab ang istorya nga alegasyong naghikog si Mercado apan ang imbestigasyon sa pulis ang labing tinuod, -- accidental firing.
Karon, gilayong mipagula og direktiba ang DCPO nga mopahigayon sila og Gun Safety and Responsible Gun Ownership aron malab-as ang abilidad sa mga pulis diha sa pagkamaabtikon sa pagdala sa ilang armas ug aron malikayan ang susama niini nga hitabo.
Angay gayod nga higayonan kini sa kapulisan ang maong pagbansay aron dili mabutang sa alanganin ug resgo ang ilang kinabuhi sa pagdala og armas sa matag adlaw.
Rest in peace, PSSg Renante Dapa Mercado.