WAY puas ang kampanya sa kagamhanan batok kurapsiyon ubos sa administrasyon ni Presidente Rodrigo Duterte.
Di na maihap ang gipangtanggal sa puwesto sa gobyerno human nga giingong nalambigit sa kurapsiyon sukad nga nahimo siyang Presidente.
Way gipili, bisan pa ang iyang mga suod nga higala, gipalagputon tungod kay sinsero siyang limpyohan sa mga kurakot nga kawani ang gobyerno.
Apan mag-unsa man siya kon di siya abagan, di lang sa iyang gabinete, apan kita mismong mga yanong molupyo sa nasud.
Niadtong Marso ning tuiga, gipagawas ang listahan sa mga giingong pinaka-kurap nga ahensiya sa gobyerno.
Base sa Presidential Anti-Corruption Commission (PACC), ang unang pinaka-kurap nga ahensiya mao ang Department of Public Works and Highways (DPWH).
Gisundan kini sa Government-Owned and Controlled Corporations (GOCCs), unya Department of Environment and Natural Resources (DENR) ug Department of Finance (DOF).
Naa pa ang Department of Foreign Affairs, Department of Transportation, Department of Agriculture, ug ang National Commission on Indigenous People.
Tinuod lisud puohon ang kurapsiyon gumikan kay nakagamot na kini sa sistema sa panggobyerno. Apan di kini imposible kon kitang tanan magtinabangay ug mohangop sa tinguha niyang kabag-ohan.
Mag-unsa man ang Presidente kon duna gihapoy mga opisyal ug kawani sa gobyerno nalambigit sa pagpanikas sa kuwarta sa kaban sa katawhan?
Kay sama sa giangkon sa Presidente sa iyang war on drugs nga ang numero uno niyang kaaway mao ang gobyerno, mao sab kini ang nahitabo diha sa kampanya niya batok kurapsiyon.