MIKAKAK ang mga anak ug tanang kabanay sa mga edaran nga nagpila alang sa pagkuha sa ilang pension, kay ilang nasayran nga luoy kaayo ang kahimtang sa ilang apuhan, inahan ug amahan sa maong takna.
Samot nga nagbagutbot ang mga kabanay dihang nakita ang mga piktyur ug video sa programa nga nag-viral sa social media nga gipangunahan sa Davao City Social Services and Development Office (CSSDO) niadtong Hulyo 28, 2018 didto sa Davao Recreation Center (Kanhi Almendras Gym).
Una niini, midugok ang mga edaran kay gipang-release ang ilang mga pension. Makita sa mga hulagway nga wala ma-sistema ang linya hinungdan nga nagdasok nalang.
Sa usa ka post nga gipadala sa netizen ug na-post sa Public Information and Inquiry Page Davao City Facebook page makita nga wa gayod ma-sistema ang programa.
Makita sab nga dunay mga nakuyapan nga mga edaran, gumikan sa kainit ug nangaipit sila.
Lagmit pipila kanila, wala pa namahaw, makasayo lamang, aron sila ang mauna sa linya.
Ang mga senior citizen, baya unta silbihan nalang kini sila, gani diha sa mga counters sila gayod ang i-prayoridad kay lagi, edaran na.
Sa maong pagkaagi, wala makita sa CSSDO kinsa ang ilang gisilbihan niadtong higayona, kay makita man gayod nga kulang og mga staff nga motabang pagpahan-ay ngadto sa mga edaran.
Lagmit wala gayod mahan-ay sa CSSDO ang programa kay kung nahan-ay pa, dili unta ingon niini kagubot ang pagsilbi sa mga edaran niadtong Sabado.
Karon kay gikulata man sa netizens diha sa mga komento ang CSSDO, unta nakahatag kini'g leksyon kanila nga sa sunod higayon han-ayon unta ang ilang mga programa.
Nanguna baya unta ang CSSDO sa pagtagad sa problema sa kabus ngari sa Davao City, pero ambot lang kay niadtong Sabado, nganong kadto ang nahitabo.
Di lang unta ang CSSDO maoy maleksyon sa hitabo, kundi lakip sab unta ang tanang buhatan sa lokal nga kagamhanan sa Davao City niining tungora.