ARON mas ma-monitor pa gyod ang kaso sa coronavirus disease (Covid-19), ang lokal nga kagamhanan sa Mati sa Davao Oriental migamit og usa ka mobile application nga makita ang realtime location o kun asa nahimutang o nagpuyo sud sa 50-meter radius ang usa ka gituohan o posible nga dunay Covid-19.
Pinaagi sa maong mobile application dali nalang karon masubay sa health department sa Mati City ang mga gisuspetsahang dunay Covid-19, hinungdan nga mahatagan dayon kini og hinanaling pagtagad aron dili na kakuyanap ang maong virus.
Subay sa monitoring pinaagi sa database map dunay talamdan sa mga kolor ug maila kung kini ba mga persons under monitoring (PUMs) o mga patients under investigation (PUIs), ingon man masayran kung confirmed Covid-19 patients kini diha sa city ug makita kung duna na ba'y namatay.
Klaro nga hulagway sa kahimtang sa Covid-19 ang ipakita ning maong mobile apps nga gi-developed ni Al Francis Delagua sa artificial intelligence PH (AI.PH), diin gigamit na sab kini karon sa IMT Covid-19 aron mapahibalo ang ubang siyudad sa kahimtang sa Covid-19 cases.
Hinuon gipasabot ni Delagua nga dili mabutang ang impormasyon sa nagpositibo o bisan mga PUM ug PUI gumikan anaa kini sa seguridad sa Data Privacy Act.
Sa Mati City, gihingusgan nila ang pag-monitor karon sa ilang siyudad pinaagi niini nga mobile apps kay gusto nila nga napabilin ang gamay nga ihap sa matakbuyan sa Covid-19.
Unta sa matag Information Technology (IT) department sa mga siyudad ug probinsya ning Davao Region, mohatag unta sila og atensyon niini nga mobile apps ingon nga mapahibalo sa mga residente kay ang mga residente na unya ang motan-aw sa ilang mga selpon.
Sa kini nga pamaagi, madugangan ang kompiyansa, makubsan ang kabalaka sa mga molupyo kinsa labing nahadlok sa Covid-19 nga mipatay og daghang kinabuhi sa tibuok kalibutan.
Sundugon unta sa ubang siyudad ug probinsya kini pag-monitor karon sa Mati City, di lang puro istorya nga gihimo sa uban, puwera sa pipila lamang ka dapit.