DAGHAN na sab ang nasubo nga mga residente sa Isla Verde, Barangay 23-C, Davao City human nanga-ugdaw ang ilang kabalayan kagahapon sa buntag.
Mokabat walo ka oras una gideklara sa Bureau of Fire Protection (BFP) Davao City Fire District nga “fire under control”. Taas ang oras sa pagbugno sa kabomberohan aron mapalong ang kalayo gumikan sakad sa mga balay sa dapit gama sa kahoy.
Ang sunog nadungan sab sa kainit sa panahon hinungdan nga daling mikanit ang kalayo sa kasikbit nga mga balay gumikan sab kay digkit-digkit kini.
Sa inisyal nga pag-ihap sa Barangay 23-C council sa mga balay nga nasunog, mokabat sa 120 ka mga balay diin mokabat kapin kun kulang 200 ka mga pamilya ang biktima.
Ang usa sa mga gireklamo sa kabomberohan mao ang kagamay sa dalan sa dapit nga kung dunay sunog, lisod kaayo masulod ang firetruck.
Dugangan pa sa mga naka-parking nga mga traysikad, payong-payong, mga sakyanan ug motorsiklo sa matag kilid sa kalsada, miresulta sa pagkalangan sa pagsulod sa mga bombero.
Gawas niini, diha say mga osesiro maong madugayan sab pagkutay ang mga hose sa fire truck.
Kini nga problema, dili kini bag-o. Kini ang kamatuoran sa mga dapit nga sama sa Boulevard ug sa Barangay 76-A, Bucana, piot kaayo ang dalan.
Daghan na og natigayong sunog sa Bucana, ug sa matag sunog segun sa matag kapitan sa mga nanlabay nga katuigan, mihimo dayon sila og balaud sa barangay nga magdili sa pag-parking sa matag kalye.
Tinuod man, nahitabo kini. Apan, maayo lang sa sinugdanan. Diin magkadugay, mamalik na sab ang mga nag-parking. Maong kung dunay sunog, madelatar gyud ang bombero sa pagsulod. Resulta, dako ang mamahimong danyos.
Sa natigayon Biyernes sa Isla Verde, nakasaway na sab ang kabomberohan sa kapiot sa dapit gumikan sa mga nag-parking.
Dili lang kagahapong adlawa nasunogan ang Barangay 23-C, apan daghan nang higayon. Ang di malimtan nga dakong sunog sa dakbayan nga diha nahitabo sa maong barangay niadtong Abril 2014 nga mokabat 8 ka ektarya ang kabalayan nga nangasunog.
Kay mora og Ningas Kugon man ang taga barangay, nan karon ang maayo niini, ang konseho nalang ang mohimo og ordinansa aron mapatuman gyud kini.
Ang kadaut ngari, basin og magkaang-kaang sab ang mga kapitan sa pagpatuman sa ordinansa. Hinaut, nga dili unta aron malikayan ang dakong danyos kung dunay matigayong sunog.