NAGKADUOL na gyud ang gitagal nga bulan ug petsa sa pag-file sa certificate of candidacy (COC) sa tanang mokandidato ma-lokal man nga posisyon o nasyonal. Apan mora'g lubog pa kaayo ug dili pa tin-aw kon modagan ba gyud si Mayor Inday Sara Duterte-Carpio sa pagka-presidente o dili.
Pero para sa ato dinhi sa Davao, seguradong-segurado na nga modagan ang atong mayor sa pagka-presidente. Nasayud na ta sa estilo sa pamolitika sa mga Duterte sukad pa niadtong 1988 nga napili siyang mayor. Basta moingon og dili na modagan, segurado modagan na. Ug moingon nga modagan, dili na modagan. Mao na ang DUTERTE politics style.
Ang atong mabati karon sa atong presidente modagan siya sa pagka-bise presidente inig katapos sa iyang termino ug ang
atik-atik nga gi-indorso kunohay sa Partido Demokratiko Pilipino (PDP-Laban) mao ang GO-DUTERTE. Bong Go for President, ug Duterte for Vice President.
Pero nasayud kita nga bisan pa'g mag-abot ang langit ug yuta dili ug dili gyud na mahitabo? Puwede ba gud nga duha ang modagan sa pagka-presidente nga pulos taga Davao? Dili sad ta motuo nga si Mayor Inday ang mo-back out ug ang modagan si Go ug ang atong presidente sa pagka-bise presidente?
Timan-i baya nga niadtong hinapos sa 2017, nalibkas gikan sa baba sa atong presidente RRD sa usa ka okasyon nga Christmas party kadto, diin matud pa niya, "Kini si Inday puwede ni nga modagan sa pagka-presidente pagkahuman sa akong termino"? Ug dawat nato na, di ba? Tungod kay mao man nay dagan sa politika dinhi sa ato. Kini tungod sa atong dakong pagsalig ug daghang nahimo ang mag-ama sa ilang pagpuli-puli sa pagka-mayor sa atong mahal nga dakbayan sa Davao.
Apan kay national figure na man ang mga DUTERTE, mora'g dili maayong paminawon nga mag-uban ang amahan ug anak - DUTERTE–DUTERTE. Daug ang mga kandidato nga taga Luzon?
Usa pa, dili ta gusto nga yagayagaan ang mga Duterte kay mahal nato na sila nga moingon ang mga taga Luzon ug Visayas ug ubang parte sa Mindanao mga hakog sila sa gahum kay pakyawon na ang duha ka posisyon?
Karon, kusog na kaayo si Mayor Inday Sara sa tibuok Pilipinas na, bisa'g unsang ahensiya sa survey sukad pa niadtong milabay'ng tuig, wala gyud mahagbong kanunay nag-number 1.
Atong hangyuon ang amahan, IPUKOS KANG INDAY, DILI NA LUBOG LUBUGON ang pagka-presidente. STOP GO-DUTERTE, kay nahibawo man gyud ta nga dili na mahitabo?
Dinhi sa ato dawat nato nang estayl, pero sa ubang parte sa Pilipinas, hilasan sila ana?
Basi'g moabot unya ang panahon nga mangluod na si Mayor Inday Sara nga dili na modayon ug dili na mo-file og CoC, history repeat itself? Nga ang amahan na pud ang magsige'g hangyo nga "DAY DAGAN NA DAY"? Kay dili na mi ni Go modayon? Pareha sa una nga dili mosugot si Inday Sara nga mag-mayor sa Davao aron dili makadagan ang amahan og presidente.
Maayo lagi og dunay mo-file pud nga modagan sa pagka-presidente nga pareho og partido para ma-substitute si Inday? Uroy og wala? Hunongon na unta nang style nga GO-DUTERTE kay di man gyud na mahitabo, di ba?
***
Paminawa ang programang KONTRA BALANSE sa DXAL - Radyo ng Masa, 90.1 dial sa FM band, 7 hangtud 8 sa buntag sa Digos City, Davao del Sur. Mabati sab sa tibuok Sarangani Province ang Radyo ng Masa sa 88.1 sa dial sa radyo, lakip na Malungon, Alabel, Maasim ug Maitum.