Gibalikan sa akong panumdoman

Gibalikan sa akong panumdoman

DUGAY na sab nga panahon nga wa ko kasuwat ning atong regular nga lindog ning mantalaan, ug ning bag-o lang, nahukman nako nga buhion na sab kini nga kulom, luyo sa usa nako ka higala nga nagsubay gyod niini, — nangutana nganong wa na daw ko nagsuwat, kay ganahan gyod kaayo baya siya mobasa, kuno.

Bitaw, duol na kaayo ang adlaw sa Pasko, ug kining mga adlawa, dili gyod nako mapugngan ang paghandom sa akong mga nangagi, uban sa akong apohan, — ang akong Lola Marciana nga wala nay molabaw pa niya sa kalibutan diri nako.

Usa ka adlaw, samtang nagsakay ko’g dyip gibalikan sa akong panumdoman ang mga kaagi niadtong bata pako. Diha ko’y katapad sa dyip nga usa ka Ginang, kugos niya ang bata nga mora’g usa pa ka tuig ang edad.

Iya kining gialam-alaman kay nagsige gyod og hilak, tupad sab niya ang inahan sa bata nga nagdala sa gamay nga bag nga dunay mga gamit ni baby. Milingi ko sa ilang sitwasyon, ug napukos ko sa mga katuigan nga akong gikumpara sa bata pako, nga posible, ingon ana sab ko.

Gihinumdom nako ang mga panahon nga susama kog edad sa maong bata, naa naman god ko sa apuhan, sukad sa paghimugso nako, gisapupo dayon ko sa akong apuhan nga gibati na gyod nako nga usa ka inahan.

Nahinuklogan nako nga dili gyod diay lalim ang pag-atiman sa atong mga ginikanan, gani man, giingon sa kadaghanan nga mas kuyaw moatiman ang apohan kaysa inahan, mao nang maka-ingon ko nga wala nay pinaka-best nako, kundi akong Lola lang.

Nakatulo akong luha, samtang nagsud-ong sa lola nga nag-alam alam sa iyang apo aron nga di na mohilak, gimingaw dayon ko ni lola, labi na sa susama niana nga mga higayon.

Usa sab sa akong nahinumdoman ang among pagbiyahe niadto sa Manila, tuig 2004 sakay kami sa Superferry ang mga sikat niadto nga barko padung sa kaulohan. Gani, sa dihang kung moadto ko sa Manila, balikan gyod nako ang mga dapit diin asa kami ni lola niadto.

Sa among biyahe sab sa General Santos City, gipalitan gyod ko niyang t-shirt sa souvenir shop. Ang Sitio Lote sa Barangay Calumpang buhing saksi sab sa akong kabatan-onan niadto. Gani, lab-as kaayo sa akong hunahuna ang mga kagahapon nga kung hapon na gani, isakay dayon ko sa kariton sa akong lolo, sundan ni lola, diha sa hawanan sa Lote nga mao na karon ang Acharon Sports Centre.

Sa miaging adlaw, samot nang gilab-as akong kagahapon uban ni lola samtang niadto ko sa iyang balay sa Bankerohan sa Davao City. Ang niadtong payag, karon atop nalang ang nagpabilin, gitun-as na sa panahon gikan sa walo ka tuig sa iyang pagbiya sa kalibutan sa mga buhi.

Nahukman nako nga sa mosunod nga mga adlaw, balikon nako ang among kagahapon ni lola Marciana, didto sa iyang balay, ug bisan ako nalang usa, isipon ko nalang nga naa siya sa palibot, ug kabalo ko nga malipay na siya nga gibalikan ug mas paninduton nako ang iyang luna, — ang iyang dapit nga iyang gibuboan og hago, gibulit sa kalipay ug puno sa kalinaw.

Kanimo, La, kung asa ka naman karon uban sa atong Manluluwas, sayod ko nga malipayon ka nga mosud-ong kanako nga paninduton na nako ang atong kanhi lagkaw.

Sayod ko nga daghan ang susama nako og kaagi nga sa apohan nagdako, kita ang mga tawo nga taas og pasensya ug independent kaayo kita sa kaugalingon, kita ang pipila sa mga tawo nga bisan sa mga pagsulay sa kinabuhi, nagmalig-on kita ug malipayon sa mga takna.

Bisan paman niining atong kasamtangan karon sa atong kinabuhi, bisan paman nga lisod ang dalan nga atong naagian, magpasalamat gihapon kita sa atong Labaw’ng Makagagahom, kay gihatagan Niya kita og maayong panglawas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph