ATONG nasinati ang unang duha ka mga lumba ni pagong ug kuneho. Sa unang lumba, nidaug si pagong tungod sa iyang kugi. Sa ika-duhang lumba, nidaug si kuneho tungod kay aduna siyay talento.
Karon, atong isumpay ang istorya niining duha ka maghigala. Tungod kay patas na man sila, dili mahimutang si kuneho. Dapat naa gyuy champion.
Busa, iyang gihagit si pagong sa pinal nga lumba, aron maklaro gyud nga siya ang champion kay kusog man lagi siya modagan. Huna-huna pod ni pagong nga iya na sad nga maisahan si kuneho, niyango pod.
Apan, iyang gitudlo ang kahoy sa pikas bungtod nga maoy ilang finish point. Kompiyansa kaayo si kuneho, niyango diretso.
Ug naglumba sila sa ikatulong higayon.
Paspas nga nakahawa si kuneho nga ang agi nag-aso-aso. Samtang si pagong, relaks lang nga nagtakang-takang apan dire-diretso.
Huna-huna ni kuneho, duol na siya kaayo, malipayong nagapadayon sa iyang paglukso-lukso. Apan sa unahan, iyang nakita, santimaan, por santo! Aduna diay suba, nga dako ug lapad kaayo!
Unsaon na lang niya pagtabok nga sa paglangoy, dili man siya kahibalo?
Nailad siya ni pagong, mao iyang pagtoo!
Nangita'g lugar nga makaambak sa pikas, ang na-stress nga kuneho. Ang iyang ilong nagbaga ug nag-aso sa kasuko pag-ayo. Wala man gyuy lugar nga iyang maambakan ngadto sa pikas, busa nagkonsomisyon sa daplin sa suba, ug naghuna-huna nga siya gitikas.
Niabot si pagong sa suba human pila ka mga oras. Inubanan sa hugyaw sa iyang mga fans, nagsalom sa suba, ug nagtungkaaw sa pikas. Nipadayon ngadto sa kahoy ug si pagong maoy champion, sa niining gihimong istorya, mao nay conclusion.
Ang yawi sa kalamboan mao ang kugi. Wala nay makalalis ana. Apan kung ikaw adunay talento, mas paspas nga imong makab-ot ang imong kalamboan.
Ug dungag niini, kung ikaw nakahibalo sa imong dalan nga agian, ang imong kalamboan mas klaro nga makab-ot nimo. Ang kakugi, inubanan sa talento ug kaalam sa dalan nga imong agian, seguradong-segurado ang imong kalamboan.
Mao nay leksiyon niining istorya.
Ni Haring Solomon (Proverbs 2: 10, 11), "Kung ang kaalam anaa sa imong kasingkasing, ug ang kahibalo anaa sa imong kalag, kini maga-amping kanimo, ug maga-atiman kanimo."
Aha man nato makuha ang kaalam nga maoy magtultol kanato sa dalan ngadto sa kalamboan? Ang Salmo 119: 105 nag-ingon: "Ang Imong Pulong maoy lampara sa akong mga tiil, ug iwag sa akong dalan." Ang Bibliya maoy atong giya sa pagsubay sa tarung nga dalan ngadto sa tinuod nga kalamboan.
Kining punto, higala, maoy atong pamalandungan, ug hulata ang sumpay sa istorya ni pagong ug kuneho sa sunod Dominggo. Ang Ginoo magpakamaayo kanimo.
