NAGLISOD ko og hubad niining pulong nga freewill mga higala, mao nga English sa atoang gamiton. Kining freewill mao kini ang makinarya sa atong pagkatawo nga adunay abilidad ug kapasidad sa paghimo og desisyon.
Matud pa nga mao pod kini ang ginatawag nga freedom of choice, o kagawasan sa paglipi. Apan tungod kay kini makina man sa atoang utok nga nagahuna-huna og mga hunahuna, dili lamang kini kagawasan, kini usa ka gahum- gahum sa pagpili.
Atong nasayran nga ang gahum sa pagpili maoy rason nganong nahulog kita sa pagpakasala, apan mao sab kini ang rason nganong nagapabilin kita nga mga matarong, kay kita nagapili sa paghimo og matarong.
Kung sa simpleng sinultian, ang freewill maoy nagapadayag sa hustisya. Walay hustisya kung walay gahum sa pagpili.
Mahukman ba diay nimo ang iro sa iyang pagpamaak tungod kay mao man na iyahang batasan? Hukman ba diay nimo ang sakyanan nga napalong sa tunga sa dalan tungod kay sa gasolina kini nahutdan?
Dili ka makahisgot og hustisya batok sa iro nga namaak tungod kay iyaha man nang kinaiya nga mamaak. Ikaw hinuon ang mabasolan nganong niduol ka sa iro, ug ang tag-iya nga wala naghipos sa iyahang iro.
Sa simpleng pagkasulti, walay hisgot ug hustisya batok sa iro tungod kay wala siya’y freewill. Ang iyang tag-iya mao’y mahisgutan og hustisya tungod kay siya ang naay freewill. Busa, adunay hustisya tungod sa freewill. Kung walay freewill, walay hisgot og hustisya.
Mao kini ka-importante ang freewill. Kini mao ang nagadala sa kinabuhi sa tawo. Kung walay freewill, walay lami ang kinabuhi tungod kay wala kita’y kagawasan sa paghimo sa mga butang nga gusto nato himuon. Ang gahum sa pagpili mao’y korona sa kinabuhi.
Kung wala kita’y gahum sa pagpili, sama lamang kita sa iro nga igo lamang mukaon kung bahugan, o mamasura aron mamakaon... muatang sa pultahan sa paghulat sa iyang agalon... mupaak kung matamakan... mutiyabaw kung masipaan... muduol na pud kung tawgon... mudula-dula na pud kung dulaon.
Pasalamat kita nga kita tawo, aduna’y gahum sa pagpili. Makapili kita kung mukaon ba ta o dili... kung kinsa atong panguyaban... kung unsang kurso atoang kuhaon... kung unsang handom ang atoang handumon.
Usa ka lami nga paminaw mao ang pagdawat og pagpangga gikan sa tawo nga ikaw mao ang iyang gipili nga higugmaon... ug pagdawat og regalo gikan sa imong amigo nga ang paghatag niya kanimo iya gayu’ng gigusto. Mao kana’y mahatag sa freewill.
Sa pikas bahin, adunay tawo nga bisan pa sa imong pagkamaayo kaniya, magapili siya sa paghalit kanimo. Diha musolod ang hustisya, kapin pa kung pati ang imong kinabuhi dauton niya. Dinhing bahin mahisgutan ang isyu sa hustisya.
Busa, atong gamiton ang atong freewill sa pagpili og matarung, kay tungod sa isyu sa hustisya, matarung sad ang produkto sa atong pagpili og matarung.