ANG awit usa ka dakung gahum nga makapa-utro kanatong mga katawhan. Makapahukmay kini sa gahi’ng kasing-kasing, makadasig sa naluyang pagbati, makapabag-o sa nadaut nga kinabuhi ug makabanhaw sa gugmang nawakli.
Adunay mag-igsuon nga puro mga lalaki. Si Venancio ang magulang, ug si Brendo ang manghud. Gagmay pa sila, gitudluan sila sa ilang inahan og awit nga giulohan, “Gugma sa puy-anan.” Sa ilang pagtubo, ila kining nahimong paboritong awit tungod kay suod man lagi sila nga pamilya.
Niabot ang panahon nga namatay ang ilang amahan. Sa kapit-os sa kinabuhi, nagsakit ang ilang inahan ug namatay human pila ka bulan. Naabot silang duha sa orphanage.
Sa orphanage didto sila naabtan, sa magtiayong mag-adopt, ang magulang mao’y napilian. Dili unta gusto si Brendo nga mabiyaan, apan dili pud pwede nga sila ju’ng duha mag-uban.
Nagtangis ang manghud sa pagbiya sa iyang magulang. Dili gayud niya gusto nga siya mabiyaan. Apan giingnan siya nga siya na pud sunod ang mapilian, ug maanindot nga kinabuhi iyang matagamtaman.
Sa iyang pagkabata, wala pa kana niya nasabtan. Busa, sa pagbiya kaniya sa iyang magulang, nasakitan jud siya’g taman. Nagdangoyngoy nga naglingkod sa daplin, naluoy sa iyang kaugalingon kay nahabilin.
Tungod adto, naggunit og dakung kasuko ang manghud sa iyang kuya. Bisan pa nga sa pipila ka mga bulan, gi-adopt pud siya. Nagdako ug naghamtong, ang manghud na-prpesyonal na. Apan sa iyang magulang, wala na gyud nagapakita kaniya.
Niagi ang pila ka mga tuig, ug ang manghud naminyo na. Adunay tulo ka mga anak, ug ang mga buhok niputi na. Apan hangtud nianang panahona, sige lang siya og pangutana, aha na iyang magulang, ug nganong gibiyaan siya?
Usa ka gabii, nibisita siya sa hospital aha ang iyang doctor nga anak nagduty. Niadto sa ward, nakita ang usa ka tigulang nga pasiente. Nagsige og singgit, nagahilak nga iritable. Apan kung mahaw-asan, nagakanta nga nagangisi.
Sa nahaw-asan na ang pasiente, nagkanta kini og pinahinay. Ug nadunggan ni Brendo ang kanta nga dili gayud niya malimtan. Iyang gilingi ang pasiente, ug nag-awit kauban niya, ug hangtud nahuman ang kanta, nag-duet silang duha.
Paghuman sa kanta, nagtotok ang pasiente kaniya. “Brendo, ikaw na?” Ug si Brendo nagyango, ug nangutana, “Ikaw ba na, kuya?” Gigakus ni Brendo iyang magulang nga si Venancio. Ug didto nabalik ang pagbati sa mag-igsuon nga sa taas nga panahon nakawang gikan kanila.
Buot pa kunta sukmatan ni Brendo si Venancio nganong gibiyaan siya. Pero sa iyang nakita nga sitwasyon, iyang nasabtan ang giingon sa iyang magulang kaniadtong bata pa sila. Ug sa pagkadungog niya sa awit sa iyang magulang, iyang nasabtan nga wala jud diay kini niundang og palangga kaniya ug sa ilang pamilya.
Ang awit mga higala makalukmay sa gahing pagbati. Mao gani nga sa panahon nga bati ang pagbati ni Haring Saul, si David mao’y iyang ginatawag aron magtukar og awit alang kaniya (1 Sam. 18: 10). Padayon sa pag-awit, higala.