SAGAD nako madunggan basta maghisgot na gani og pagkaon ang sinultian nga “You are what you eat.” Sa atong pinulungan, “Kita produkto sa atong ginakaon.”
Bisan pa nga dili tanan nga nagakaon og mga karne ug mga fastfood nga pagkaong mga tambok, pero kung makakita ta og mga bilbilan ug mga habok og lawas, makaingon ta nga ing-ana ang ilang pagkaon; sa mga dagko’g tiyan, palahubog; sa mga niwang, vegetarian; sa mga mipis kaayo og lawas, naga-diet; ug sa mga sobra ka niwang, malnourished.
Dili gayod malikayan nga makahuna-huna kita og pagkaon bisan pa sa atong mga sitwasyon, kung himsog, makahuna-huna kita nga gulay ug prutas ang iyang ginakaon; kung high blood, puro karne ang ginakaon; kung naay sakit sa kidney, puro dry ang pagkaon; ug kung masakiton, wala’y ginakaon.
Ug kung aduna’y coronavirus, kwaknit (tingali) ang ginakaon. Mao kini ang dakong problema nato mga higala kay bisag unsa nalang ang atong kaonon. Kining ginatawag nga mga “exotic food” ang nakahatud kanato og mga problema sa panglawas ug sa kinabuhi.
Atong mahinumdoman nga sa niaging mga panahon, aduna po’y virus nga nigikan sa unggoy nga mipatay og linibo ka mga tawo. Ug gani, bisan pa sa baboy, naa pa gihapon ning kagaw kay bisag unsang lata nimo niini, dili pa kini mamatay.
Unta atong mahinumdoman sab, mga higala, nga ang Ginoo naghatag kanato og mga prinsipyo aron malikay kita sa mga sakit pinaagi sa pagkaon. Kini mabasa sa Leviticus 11.
Diha gisulat ni Moses ang mga mananap nga puwede kaonon, ug ang mga mananap nga dili gayud dapat kaonon tungod kay mga hugaw kini sila, ug mahimong makahatag og sakit.
Ang problema, kitang katawhan usahay, ganahan og supak-supak tungod gusto nato mahibaw-an ang mga misteryosong butang, kapin pa sa mga ginabawal. Busa, gitilawan sa uban ang buaya, halas, baboy, pagong, unggoy, kwaknit ug uban pa.
Mao kini ang epekto. Sakit nga makamatay.
Unta sundon lang gyud nato ang sugo sa Diyos parte sa atong pagkaon. Wala gyud unta’y mahimong mga problema sama aning coronavirus nga gikahadlokan sa kadaghanan.
Wala unta kita nakagasto og binilyon nga dolyares labot niining coronavirus disease-2019, o magpatindog og mga hospital nga pinakalit, o magpalit og kinarton nga face masks, ug walay mga nangamatay tungod aning sakita.
Unta, mga higala. Apan dili pa ulahi ang tanan. Aduna’y bidlisiw sa paglaum bisan pa niining panahona. Magbalik lamang kita sa pagsunod sa mga prinsipyo sa Ginoo parte sa atong panglawas.
Kini mao ang mga masunod: Pagkaon og mga prutas, gulay ug organic nga mga tanom; pag-inom og sobra duha ka litrong tubig matag-adlaw; pagtulog sa walo ka oras; pag-ehersisyo; pagpa-init sa adlaw trenta minutos matag buntag o hapon; pagdili sa sigarilyo o ilimnon; ug pagdangop sa Ginoo sa tanang oras. Sunda kini aron makabaton ka og kaluwasan gikan sa mga sakit.