KARONG mga panahona, nangalisang ang kalibutan tungod sa coronavirus. Sa kadaghan sa mga natakdan, naproblema ang kadaghanan. Bisan pa ang mga dili nerbiyoso nga katawhan, tungod niini nga virus, sila nangalisang.
Sa taphaw nga pag-asoy, kining giingon nila nga coronavirus disease 2019 (Covid-19) ginakompara sa flu nga sakit nga sagad kanato. Gani, sa statistics nga atong nabasa sa internet, mas daghan pa ang mga nangamatay tungod sa flu compara sa coronavirus. Galing lang, daghan naman ang tambal sa flu mao nga dili kaayo dako ang kabalaka sa uban niini. Apan ang coronavirus, wala pay tambal nga na-imbento batok niini.
Sa ubang pinulongan, bisan pa unsa ka gamay ang pagkadelikado sa usa ka butang, kung dili kini matambalan, dakong kadaot ang mahatag niini.
Daghang mga dili kaayo delikado nga mga butang ang atong ginapasagdan nga mahitabo sa atong kinabuhi. Ang pag-inom og softdrinks usa na ana. Wala kita nasayod nga sa sige nato og inom niining mga imnonon, nagadaut kini sa atong lawas.
Samot na ang mga makahubog nga imnonon. Ang atong kasagaran nga ginapamalibad mao nga gamay lang daw ang atong ginainom. Pangpainit lang daw sa dugo. Apan kalagmitan, madaghanan man gyud nimo ang imong mainom, unya mag-maoy ka dayon.
Usa pod niini mao ang pagkaon og mga tam-is nga pagkaon. Imo nalang mahibaw-an, human pipila ka mga bulan, naa na ka’y tonsilitis. Taas na imohang sugar. Human pipila ka mga tuig, naa na ka’y diabetes. Mao ni’y mga virus sa atong lawas, mga higala. Ginagmay nga mga dautan, apan kung dili mabantayan, ug dili malikayan, muhatud kanato sa kamatayan.
I-apil pud nato niining virus ang atoang mga kalagot sa atong silingan. Sa matag-adlaw nga atong gina-ihap ang ilang mga dautang hinimoan, ang intensidad sa atong kasuko madungagan. Hangtud nga muabot ang panahon, sa wala nimo giplanohan, imong mapatay ang imong silingan. Mao kini nga dapat kining mga virus mapugngan, aron kasakit sa kinabuhi dili na gyud madugangan.
Ang maayong balita mao nga kung kusog ang atong resistensiya, sa coronavirus dili kita matakdan. Kung sa ato pa, kung kusog ang atong pagkaon sa mga saktong pagkaon, dili na kita gutumon ug mga tam-is kaayo nga mga pagkaon.
Kung sakto pod ta og inom og tubig, dili na kita mangita pa og softdrinks. Ug kung ang maayo lamang nga mga butang ang atong hinumdumon parte sa atong mga silingan, sa ilang mga kakulangon wala na kita’y mabutangan.
Ang atong paggunit sa mga butang nga mga matarong, pagkaon og saktong mga pagkaon, pag-inom ug saktong mga imnonon, mao’y magalikay kanato gikan sa delikadong kaugmaon, ug mao’y bidlisiw nato karon sa paglaum.