HELLO February! Dalia ra gayod sa panahon, higala. Morag bag-o pa lamang kita nanghipos sa mga Christmas decors pero morag feeling nako hapit na pod ang Pasko ho ho hoooo! Bitaw, grasya ni Lord, buhi pa kitang tanan busa sa Diyos ato kining pasalamatan.
Hinay... I mean, naundang ang akong panagat karong panahona tungod nagkamang ang koneksyon sa internet, bisan kompleto ang bayad nako permi. Maka-discount unta mi no kay ningpangit man ang serbisyo. In fairness, karon ra hinuon kini nahitabo sa akoang linya busa I’m hoping nga maayo na kini dayon aron anaa na koy pangpalit og pagkaon.
Kagahapon, gilaay ning inyong tambok nga igsuon busa gisulayan nakog lili ang usa ka kwarto sa akong panimalay nga nahimo nag bodega. Giplastar kuno nako ang ubang kagamitan sama sa carpet nga karaan nga nahimo ng balay sa mga insekto busa baho na kaayo.
Tapulan gayud kaayo ko manghinlo og balay, higala busa dili ko puwede mangatabang sa gawas sa atong nasud kay basin og mapatyan ko sa amo hu hu! Kugihan (kuno) ko motrabahog laing mga matang basta dili lang gayud panglaba ug panglimpyog balay, miga ha ha!! Yes, damak ko hu hu!
Seriously, hastang daghana diay nakong natapok nga mga box kon kartong papel sama sa sudlanag gatas, gadget, alahas ug uban pa nga ning abot kapin usa ka gatus, higala. Bantog nanaghan kaayo ang mga uk-ok sa akong panimalay kay daw dunay condominium o playground ang mga insekto sa pikas kuwarto.
I asked myself nganong gipanigum nako ang daghan kaayong mga karton, ug ang tubag...secret! Bitaw, anugon ilabay ang maong mga box kay mamahimo kining magamit sa ubang pamaagi. Akong unang rason, sudlanan sa mga putusong regalo sa bertdey, bunyag ug uban pa sa akong pamilya, higala ug mga kaila.
Ang pangutana, nagamit ba ang maong mga kahon sa husto o nahimo na lamang basura sud sa balay nako? Ang tubag... “not so” kay dili man diay kaayo ko manggihatagun, migo. Makapamutos ra ako’g gasa inig kinahanglan ra, ug dili aron magpabida.
Ang mga box nagdala kanako sa panghunahuna nga kitang mga tawo usahay morag nakahon (boxed) sa mga ideya, tinuohan o ideolohiya nga hinungdan sa atong kapakyasan o kalampusan.
Sama sa akong silingan nga si Pangga Esto nga magpabilin kunong Katoliko bisan na pastor sa Pentecostal ang maguwang niya (magbuot si Kuya?). Aduna kitay kagawasang mopili sa atong mga relihiyon ug tinuohan busa dili kita magbuot sa desisyon sa atong kapamilya, higala o silingan.
Maghatag ra kita’g “advise” taman kay wala gayud baya’y relihiyon nga makaluwas sa atong mga kalag. (Sumpayan)