“Maayo na lang nga ang Diyos wala nagkulang sa pagtagbo sa atong mga gikinahanglan ilabi na sa emosyonal ug ispirituwal nga bahin.”
HELLO!
Akong dakung kalipay nga hangtud karon, managkauban gihapon kita sa pagpanikaysikay sa earth, igsuon. Condolence sa mga namatayan, ug sa mga buhi pa- pasalamati ang Diyos sa grasya nga naangkon ta.
Kapin upat ka bulan nga naglatagaw ang akong panghunahuna ug dughan. Dili ni “hugot” oi! Natural man kuno nga moagi kita'g kauga (dry) ug kalaay, migo. “I'm just going through the motions” kay lagi naningkamot ko'g buhat sa akong responsibilidad apan walay kahinam, kalipay o kadasig sa akong dughan bisan gamay. Nakaagi na ba mo ani? Laay, lagi.
Anyway, tungod nagatuo ako sa Diyos nga Labaw'ng Gamhanan, Kaniya ra nako gisugid ang tanan. Pinaagi sa pag-ampo ug pangaliya, nagapanghinaut ko nga makabaton og gana kay ninggraduwar na unta ko niadtong nilabay'ng Hunyo kung nahuman akong thesis, migo, hu hu!
Usahay man god ang daghang problema, makahubas sa atong kalipay bah! Maayo na lang nga ang Diyos wala nagkulang sa pagtagbo sa atong mga gikinahanglan ilabi na sa emosyonal ug ispirituwal nga bahin, mga silingan.
Niadtong Huwebes, gipukaw ko sa Ginoo sa paghinumdom sa pulong sa Bibliya nga anaa sa Salmo, kapitolo 127, diin nagkanayon og, “Gawas kon ang Ginoo magtukod sa balay, kadtong nagtukod niini nagbuhat nga kawang. Gawas kon ang Ginoo nagbantay sa siyudad, ang magbalantay magpabilin nga nagmata nga walay pulos. Kawang lamang ang imong pagbangong sayo, ug moadto aron makapahulay, nga nagkaon sa tinapay sa mabalak-on nga kabudlay; kay Siya nagahatag sa Iyang hinigugma nga pagkatulog; Ania karon, ang mga kabataan mao ang panulondon gikan sa Ginoo.”
Taas no? Sa laktod, bisan unsaon nato'g pagpaningkamot kung walay dihog sa Ginoo- kapuyon ra kita sa taman, migo. Bisan liboan ka kapulisan ug kasundalohan ang magbantay sa atong dapit; wala kini pulos kay ang Diyos lamang makahatag kanato'g proteksiyon ug maayong pagkatulog, igsuon. Ang atong mga anak bisan hagit ang pagpadako kanila- gasa gihapon sila sa Kahitaas-an mao bulahan kita nga nakabaton kanila.
Kung dili nato unahon ang Ginoo- budlay ang pagkinabuhi, migo. Rason kini nga mangita ta'g daghang kalipayon kay kawang ang atong kasudlan. Salamat sa pagpahinumdom sa Ginoo nga dinhi sa kalibutan- ang Ginoo ang labaw natong gikinahanglan. Kaniya ug Siya ang atong katagbawan. Amen.