COTABATO CITY -- Gituohang dumot sa pamilya ang gilantaw sa mga awtoridad nga motibo sa pagpusil patay sa opisyal sa Moro Islamic Liberation Front (MILF) alas 9:00 sa buntag, Lunes, Hulyo 21, 2025, sa Maguindanao del Sur Province.
Giila ang biktima nga si Kumander Buntok Utap sa 106th Base Command sa MILF.
Samtang usa sab ka babaye ang nadala sa balay tambalanan human nga naigo sa saag nga bala.
Gibutyag ni Maguindanao del Sur Police Provincial Office (MDSPPO) Director, Police Colonel Sultan Salman Sapal nga nagtindog ang biktima sulod sa Dansalan Elementary School sa Barangay Panadtaban, Rajah Buayan sa maong probinsiya samtang naghatud sa iyang anak nga nagtungha.
Apan kalit lang nibutho ang duha ka wala mailhing lalaki ug dayon pusil kang Utap tumong sa ulo ug dayong sibat sakay sa motorsiklo.
Si Utap giingong on the spot nga namatay samtang gidala ang angol nga babaye ngadto sa ospital human naigo sa saag nga bala.
Kahinumdoman nga bag-o lang nahusay sa militar ug kapulisan ang away tali kang Kumander Utap ug Brgy Kapitan Norodin Utto Jr.
Gipalawman pa sa kapulisan sa Rajah Buayan Municipal Police Station ang imbestigasyon sa pagpusil patay sa biktima.
Sa pikas bahin, pasakaan og kaso nga kalapasan sa Republic Act 9165 o Comprehensive Dangerous Drug Act of 2002 ang duha ka mga high value targets nga nadakpan sa mga awtoridad alas 4:00 sa hapon, Lunes, Hulyo 21, 2025, sa siyudad.
Sa pagkasikop sa mga suspek nga sila alyas Abubakar ug alyas Jomer, nakuhaan sab sila og shabu nga nitambang og 250 gramos nga mobalor og P1,700,000.
Sumala kang Cotabato City Police Office (CCPO) Director, Police Colonel Jibin Bongcayao nga nagpahigayon og drug buy-bust operation ang mga sakop sa Philippine Drug Enforcement Agency-Bangsamoro Autonomous Region (PDEA-BAR) uban ang kapulisan sa Notre Dame Avenue, Barangay Rosary Heights 4 sa dakbayan.
Sa dihang gitunol na sa mga suspek ang shabu ngadto sa PDEA-agent, giambakan gilayon sila ug giposasan.
Nailog sa posisyon sa mga suspek ang maong ilegal nga druga, buy-bust money, ug mga personal nga kagamitan.
Giingong nalambigit ang mga suspek sa drug large scale operation sa Cotabato City, Maguindanao del Norte, Maguindanao del Sur, ug North Cotabato Province.
Balhog na ang mga suspek sa prisohan sa PDEA-BAR samtang nagpaabot kanus-a bistahon sa hukmanan. (Edgar E. Fuerzas)