NAARESTO sa mga awtoridad ang usa ka taas nga opisyal sa New People’s Army (NPA) ug lain pang pito ka mga miyembro sa ilang armadong yunit atol sa hiniusang operasyon sa militar ug pulis aron puhagon ang katapusang mga nahabilin nga elemento sa Jaguar Platoon sa Southern Mindanao.
Ang operasyon gilusad niadtong Hunyo 13, 2025, sa duha ka mga lugar sa Barangay Bunawan Brooke ug Purok 2, Barangay San Teodoro sa Bunawan nga niresulta sa pagkaaresto sa opisyal ug mga miyembro sa Southern Mindanao Regional Committee (SMRC), usa ka dakong yunit sa NPA sa rehiyon.
Subay sa taho gikan sa Philippine Army’s 10th Infantry Division (10ID), mga naaresto naglakip kang Charisse Bernadine Bañez, labing nailhan isip Nikki o Nikol, kinsa nailhan isip platoon secretary; Louvaine Erika Espina, alyas Pam o Tugas, medical unit officer; ug Ronnie Igloria, alyas Gideon, Rey, o Papang, kinsa nagsilbi sab isip vice commander. Apil nga nadakpan mao sila Arjie Guino Dadizon, alyas Ronron, nailhan isip squad leader; Sinag Lugsi, alyas Jomilyn; Grace Niknik T. Man-Aning, alyas Jelyn; Larry Montero, alyas Laloy; ug Daryl Man-Inday, alyas Tonton.
Ang malampuson nga ronda mao ang resulta sa hiniusang "intelligence and combat operations nga naglambigit sa Intelligence Service of the Armed Forces of the Philippines (ISAFP), 10th Infantry Division, 60th Infantry Battalion ubos sa 1001st Infantry Brigade, ug ang 67th Infantry Battalion ubos sa 701st Infantry Brigade. Dugang suporta nagagikan sa Regional Intelligence Division sa Police Regional Office 13 ug 2nd Provincial Mobile Force Company.
Mga awtoridad nakasakmit og mga armas ug improvised explosive devices (IEDs), gituohan nga gitipigan alang sa planong pagpangatake.
Gidayeg ni Major General Allan Hambala, commander sa 10th Infantry Division, ang mga tropa ug ang ilang mga partner units alang sa propesyonalismo ug epektibong koordinasyon. Iya sab nga gitin-aw nga ang operasyon gilusad nga walay namatay o naangol, nagpahimug-at sa ilang kalampusan sa paglukmay sa impluwensiya insurhensiya sa lugar ug nakatampo sa rehiyonal nga kalinaw ug seguridad. (David Ezra Francisquete)