Opisyal sa pulis napatay sa operasyon; 1 suspek tipi sab

Opisyal sa pulis napatay sa operasyon; 1 suspek tipi sab
Pinaambit nga hulagway

BUGHA ang usa ka opisyal sa Philippine National Police (PNP) sa nahitabong operasyon alas 11:05 sa buntag, Huwebes, Mayo 2, 2024, sa Parang, Maguindanao del Norte.

Naila ang napatay nga si Police Captain Roland Moralde, 44-anyos, taga Caloocan City nga nadestino sa Regional Mobile Force Battalion (RMFB) 14 sa Police Regional Office sa Bangsamoro Autonomous Region in Muslim Mindanao (Barmm).

Samtang patay sab ang suspek sa operasyon nga si Mohiden Untal samtang laing duha niini kakaubanan nasignit nga pulos mga molupyo sa Barangay Poblacion 2, Parang, Maguindanao del Norte.

Matud ni Parang Chief of Police Major Christopher Cabugwang nga nasiplatan ni Moralde si Untal nga dunay dala nga pusil nga gisuksok sa iyang hawak sa Parang Public Market ug gisita.

Apan kalit lang nihulbot ang suspek sa iyang pusil ug nakigpinusilay kang Moralde, apil ang iyang mga kauban.

Patay si Moralde ug Untal nga pulos nakaangkon og daghang samad pinusilan sa ilang lawas.

Nakuha gikan sa crime scene ang mga basiyo sa M16 Armalite rifle, caliber .9mm ug kalibre .45 nga pistola.

Nilusad dayon og pursuit operation ang kapulisan sa Parang MPS hinungdan nga duha ka kauban sa suspek nadakpan.

Giingong duha sa mga sakop sa maong grupo miyembro sa usa ka law enforcement unit.

Sa pagkakaron, padayon pa ang imbestigasyon sa Parang MPS sa mga dinakpan. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph