KORONADAL CITY - Nagbukas na ang Migrant's Brew sa Overseas Workers Welfare Administration (OWWA-12) Regional Office sa Koronadal City.
Usa kini ka gamay nga coffee shop nga nagtanyag og libreng kape sa mga OFW ug ilang mga pamilya nga adunay transaksyon sa OWWA 12.
Matod ni OWWA 12 Regional Director Christelyn Caceres, ang nagpasiugda sa Migrant's Brew mao si OWWA Administrator Arnell Ignacio.
Kini unang gilusad sa OWWA main office sa Pasay City niadtong 2022 ug gisundan na kini sa ilang regional offices sa nasud.
Gidugang ni Ignacio nga katuyoan niini nga mahatagan og kaharuhay ang mga OFW ug mabati nga giatiman sila sa gobyerno.
Dugang pa sa OWWA administrator nga kini isip pag-ila usab sa kontribusyon sa mga OFW sa ekonomiya sa nasud.
Ang pagbukas sa Migrant's Brew usa usab ka highlight sa pagsaulog sa OWWA 12 sa National Women's Month karong bulan sa Marso.
Gipaklaro ni Caceres, sinugdanan pa lang kini sa usa ka buwan sa mga aktibidad nga magpasiugda sa gender equality ug kaayohan sa mga OFW.