MOKABAT sa P1.2 milyon nga kantidad sa giingong shabu ug party drugs ang nakumpiska sa kapulisan sa Mandug Police Station gikan sa posisyon sa 21-anyos nga babayeng negosyante human kini nasikop sa awtoridad atol sa gihimong buy-bust alas 11:44 sa gabii, Hulyo 20, 2025, sa Agleham St., Block 4, S.I.R. Phase 1, Barangay 76-A, Davao City.
Ang suspetsado nga nailhan nga si alyas Chang, dalaga ug negusyante, nagpuyo ra usab sa maong lugar.
Ang operasyon gipangulohan ni Police Lieutenant Ronaldo M. Abiera ubos sa direktang superbisyon ni Police Major Rejie Gucor Torrita.
Nasikop si Chang human nga makuha gikan kaniya ang usa ka medium-size nga pakite nga adunay sulod nga gituohang shabu nga dunay gibug-aton nga 5 gramos ug gibanabana nga dunay kantidad nga P34,000, nga iyang gibaligya sa poseur buyer ug ang buy-bust marked money.
Sa pagkapkap ngadto sa suspek, nakuha pa ang dugang 140 gramos nga shabu nga nagkantidad og P952,000, unom ka medium-size nga pakite nga adunay 30 gramos nga shabu nagkantidad og P204,000, ug 17 ka party drugs nga lahi-lahi'g kolor (blue, pink, ug black) nga gibanabana og kantidad nga P25,500.
Apil usab sa nakuha gikan sa suspetsado ang usa ka iPhone 13, buy-bust money, personal nga kuwarta nga P2,600, ug itom nga sling bag.
Giandam na ang kasong kalapasan sa Section 5 ug 11, Article II sa R.A. 9165 kon Comprehensive Dangerous Drugs Act of 2002 batok sa suspek ngadto sa korte. (Jeepy P. Compio)