MOABOT lang sa 16 ka kontender ang magtigi sa 2025 Indak-Indak sa Kadayawan, uban ang three peat champion Sindac Anib’s Performing Arts Guild sa Bislig, Surigao del Sur nga nibalik sa kompetisyon.
Gitug-an ni Harold Quibete, event organizer sa Kadayawan Festival, nga sa 16 ka kontender, walo niini alang sa Davao School-based category ug walo sab alang sa open category.
Dugang ni Quibete nga ang Sindac Anid ug defending champion sa niaging tuig mosalmot aron panalipdan nila ang ilang titulo alang sa open category.
Matud niya nga ang Davao City National High School nibalik sab aron nga depensahan ang ilang titulo, kon diin ang tulunghaan nidaug na og makaduha ka higayon alang sa Davao City school based category. Kung ugaling makadaug na sab sila karong tuiga, mopahulay sila og usa ka tuig aron nga hatagan og higayon ang ubang entrante nga mahilakip sa champion’s circle.
“We are very happy that the turnout of the Davao City school based category kay padaghan ug padaghan na siya. So that’s a good sign nga daghan na pud eskwelahan not only those with SPA in their curriculum but also to give like importance because the main core of our celebration sa Kadayawan sa Davao is you know paying tribute to the 11 ethnolinguistic tribes,” pagpasabot niya atol sa Habi at Kape niadtong Miyerkules, Agosto 13, 2025, sa Ayala Malls Abreeza.
Mga premyo alang sa open category ug sa Davao City schools category matag usa modaug og P1 milyon uban ang plaque, ug 150 medalya ang ilugan. Ang mahiluna sa ikaduhang puwesto mobulsa og P500,000, ikatulo modawat og P400,000, ikaupat P300,000, ikalima P200,000, ug 10 consolation prizes nga P50,000 matag usa.
Ang Best in Music, Best Choreographer, ug Best in Artistic design makadawat og P50,000 matag usa.
Samtang sa Pamulak sa Kadayawan, gibutyag ni Quibete nga dunay mga unom ka mga partisipante alang sa dako category, 12 alang sa gamy category, ug ang non capering floats 10.
Ang grand winner alang sa Pamulak big category mouli nga dunay P800,000, ikaduha P600,000, ikatulo P400,000, ug upat ka mga consolation prizes nga P100,000 matag usa. Samtang sa gamay category, ang grand champion mobulsa og P500,000, ikaduha P400,000, ikatulo P300,000, ug consolation prizes nga P75,000.
Gilauman sab ni Quibete nga dunay mga 6,000 ka walking contingents nga mosalmot sa Indak-Indak sa Kadayawan ug Pamulak sa Kadayawan parade sa Agosto 17, 2025. Nakigkoordinar na ang ilang buhatan sa Public Safety and Security Office (PSSO) ug uban pang security forces aron pagseguro nga luwas ang selebrasyon sa Kadayawan Festival. Sama sa niaging tuig, ang duha ka dagkong kalihukan sa Kadayawan festival, Pamulak ug Indak-Indak, hitabuon sa samang adlaw. (Rojean Grace G. Patumbon)