MOABOT sa P2,373,880 ang kinatibuk-ang kantidad sa gidiling druga nga nasakmit sa mga awtoridad sa gilusad nga duha ka drug buy-bust operation sa managlahing lugar sa Dakbayan sa Davao Miyerkules sa kaadlawon, Hunyo 18, ug gabii niadtong Martes, Hunyo 17, 2025.
Sa maong mga operasyon, upat ka mga suspek ang naaresto diin usa kanila gikonsidera nga Top 9 Regional Level ug laing usa sab Top 1 City Level drug personality.
Unang operasyon nahitabo sa Keith Williams, Catalunan Pequeño ning siyudad diin naaresto ang Top 9 Regional Level drug personality nga si alyas Bords ug kauban niini nga si alyas Kenkyle, kon diin nasakmit gikan kanila ang gituohang shabu uban ang standard drug price value nga P1,802,000.
Si alyas Bords, nagpangedaron og 31-anyos, dunay live-in partner, welder, ug molupyo sa Astorga, Sta. Cruz, Davao del Sur samtang si alyas Kenklyle, 24-anyos, ulitawo, painter, ug molupyo sa Phase 2, Lanzones Street, Relocation, Tugbok, Davao City.
Nasayran sa kapulisan sa Baliok Police Station (Police Station 17) sa Davao City Police Office uban ang Crisis Intervention Team (CIT) ug Regional Intelligence Division (RID 11) nilusad og buy-bust operation uban ang pakig-koordinasyon sa Philippine Drug Enforcement Agency (PDEA) sa Keith Williams, Catalunan Pequeño nga niresulta sa pagka-aresto sa mga nahisgutang suspek.
Nasakmit gikan sa mga suspek mao ang mga nagkadaiyang rectangular shape heat sealed transparent plastic sachet nga dunay sulod sa gituohang mga shabu, usa ka tinuod nga kinyentos pesos nga papel, usa ka libo ka pesos nga papel ug duha ka buok boodle nga tag-usa ka libo nga peso nga papel; usa ka kolor itom nga sling bag; usa ka kolor pink nga pouch ug usa ka yunit sa kolor puti nga selpon.
Gawas sa mga nahisgutan, narekober sab sa mga pulis gikan sa mga suspek ang usa ka yunit sa homemade .38 caliber revolver pistol ug tulo ka buok nga buhing bala sa .357 ug usa ka yunit sa dark blue nga Suzuki Transformer nga dunay plaka MFT 802.
Mga nahisgutang mga ebidensiya giimbentaryo didto mismo sa lugar uban sa presensiya sa mga suspek ug mga saksi subay sa gimando sa balaod.
Samtang dakpan sab ang Top 1 City Level drug personality nga si alyas Kols ug laing kauban niini ug nasakmit ang mga gituohang shabu nga dunay standard drug price value nga P571,880.00 sa laing drug buy-bust operation alas 8:35 sa gabii, Martes, Hunyo 17, 2025, sa Phase 2, Gulfview Subdivision, Barangay Bago Aplaya, Davao City.
Si alyas Kols nagpangedaron og 29-anyos, minyo, tricycle driver ug molupyo sa Barangay Lapu-Lapu, South Bay, Agdao District, Davao City samtang ang kauban niini mao si alyas Julito, 29-anyos, ulitawo, delivery rider ug molupyo sa Nograles Street, Barangay Bucana, Davao City.
Sa maong operasyon, mga pulis sa Baliok Police Station nakasakmit og nagkadaiyang rectangular shape heat sealed transparent plastic sachet nga dunay sulod nga gituohang mga shabu; usa ka tinuod nga kinyentos pesos nga papel ug duha ka tag-usa ka libo nga tinuod nga pesos nga papel uban ang duha sab ka buok nga tag-usa ka libo nga pesos nga boodle nga papel; usa ka kolor brown nga sling bag; usa ka yunit sa itom nga Suzuki Raider nga motorsiklo nga dunay plaka 723LLT; usa ka dark green nga Keeway nga motorsiklo nga dunay temporaryong plaka nga 1336-041956; ug usa ka yawe.
Mga dinakpan kasamtangang tingkagol sa selda sa kapulisan samtang giandam ang mga kaso nga ipasaka batok kanila ngadto sa korte. (Wenz G. Mendoza)