GIBUTYAG sa National Bureau of Investigation-Southeastern Mindanao Regional Office (NBI-Semro) sa usa ka espesyal nga press conference niadtong Hunyo 9, 2025 nga mga suspek nga nagpaluyo sa P23-milyones nga kantidad sa mga illegal nga druga pabilin pang gawasnon, kon diin kasagaran sa nasakmit nga mga druga nagagikan sa Luzon.
Sa pagpresenta sa nasakmit nga mga ilegal nga druga ug paraphernalia, gisulti sa mga opisyal sa NBI-Semro nga bisan tuod kon ila na nga nailhan ang duha ka mga indibiduwal nga nalambigit sa ilegal nga operasyon sa druga, wala'y gihimong pag-aresto atol sa ronda sa balay sa Emily Homes Subdivision, Cabantian, niadtong Hunyo 8.
Ang balay gitaho nga gigamit isip "repacking" ug "distribution hub" sa mga ilegal nga druga.
Esplikar ni NBI-Semro Regional Director lawyer Archie Albao ngadto sa mga tigbalita sa Davao nga mga awtoridad nag-andam na sa pag-isyu og subpoenas ngadto sa mga nailang indibiduwal, bisan tuod kung ang ilang mga pangalan gipugngan tungod sa nagpadayon nga imbestigasyon.
Iyang gikompirma nga wala pay suspek ang nadakpan sa operasyon, kay way tawo nga niabot sa lugar aron nga kolektahon ang mga druga.
Sumala ni Albao, nga ang operasyon nahitabo human usa ka caretaker sa gironda nga balay nidangop sa ilang ahensiya, niangkon nga di na niya makaya ang mga aktibidad nga nahitabo sa balay.
Tungod niini, mga operatiba sa NBI naglusad og pagpaniid sulod sa duha ka adlaw. Ug hangtud nga nakahukom silang sudlon ang balay sa dihang wala gyuy indibiduwal nga niabot aron nga kuhaon ang mga druga.
Nagtuo sab sila nga mga suspek mogamit og food delivery nga negusyo isip prontahe alang sa pagkatag-katag sa druga, nga gialegar nga naglihok na og mga usa ka tuig.
Gipahimug-atan sa NBI nga mga kaso ipasaka batok sa mga responsable kung ang tanang mga ebidensiya mausa na.
Atol sa ronda, nakasakmit ang mga awtoridad og gibana-bana nga 4.885 kilogramo sa high-grade marijuana (kush) nagkantidad og P5.86 milyon, 1.575 kilogramo sa shabu kantidad og P17..325 milyon, ug nagkadaiyang mga drug paraphernalia.
Kini naglakip sa mga kahon sa food delivery gigamit, heat sealers, ug repackaging nga gamit.
Nagpresenta ang NBI og nagkadaiyang imported nga cannabis-based products, sama sa Multiple Boutique Switch V3 HCT Concentrates, Kaws Exotic ug uban pa.
Sumala ni Albao, ang mga packaging sa kadaghanan sa mga butang nagtimaan nga gipadala kini gikan sa Luzon.
Kasamtangan, gipasalig ni Albao nga padayon ang ilang imbestigasyon sa kaso ug padayong naniid aron nga madakpan ang mga suspek nga nalambigit sa ilegal nga kalihukan. (David Ezra Francisquete)